चेकमार्फत् घुसको कारोबार, २ लाख ७५ हजारसहित इन्जीनीयर चौधरी पक्राउ

काठमाडौं । धनुषाको शहीदनगर नगरपालिकामा कार्यरत इन्जिनियर रमेशकुमार चौधरी र उनका साथी गुरुदेव यादवलाई २ लाख ७५ हजार रुपैयाँ घुससहित अख्तियार दुरुपयोग अनुसन्धान आयोगको टोलीले नियन्त्रणमा लिएको छ ।

रु. १ लाख रुपैयाँ नगद र १ लाख ७५ हजार रुपैयाँको  चेकसहित चौधरी र यादवलाई आइतबार अख्तियार दुरुपयोग अनुसन्धान आयोगको कार्यालय, बर्दिवासबाट खटिएको टोलीले नियन्त्रणमा लिएको हो ।

इन्जीनीयर चौधरीले वाल निर्माण कार्य सम्पन्न पश्चात् सो कार्यको भुक्तानी दिने क्रममा सेवाग्राहीसँग घुस माग गरेको उजुरी निवेदनका आधारमा अख्तियारले रकम लिइसकेपछि शहीदनगर नगरपालिका वडा नम्बर ३ स्थित पशु सेवा केन्द्रको भवनबाट नियन्त्रणमा लिएको आयोगको विज्ञप्तिमा उल्लेख छ ।