मिटरब्याजसम्बन्धी जाँचबुझ आयोगद्वारा पीडितलाई निवेदन दिन आह्वान

काठमाडौं । मिटरब्याजसम्बन्धी जाँचबुझ आयोगले निवेदन दिन पीडितहरुलाई आह्वान गरेको छ । आयोगका अध्यक्ष गौरीबहादुर कार्कीले आज एक सूचना जारी गर्दै मिटरब्याजबाट पीडितहरुको निवेदन आह्वान गरेका हुन् ।

आयोगले प्रारम्भिक काम सुरु गरिसकेको उल्लेख गर्दै वैशाख १७ देखि ३१ गतेसम्म १५ दिनभित्र निवेदन दिन पीडितहरुलाई उनले आग्रह गरेका छन् ।

आयोगका अध्यक्ष कार्कीका अनुसार पीडितहरुले आफ्नो भएसम्मका सवुद प्रमाणसहित अनलाइनबाट सिधै आयोगमा वा जिल्ला प्रशासन कार्यालयमा निवेदन दिन सक्ने छन् । प्रत्येक जिल्ला प्रशासन कार्यालयमा मिटरब्याज पीडित सहायता कक्ष स्थापना गरिएको भन्दै उनले सोही कक्षमा निवेदन फाराम निशुल्क उपलब्ध हुने बताए।

‘पीडितहरुले आफ्नो भएसम्मका सवुद प्रमाणसहित भएको व्यहोरा खुलाई अनलाइनबाट सिधा यस आयोगमा वा निवेदकको जिल्लामा रहेको जिल्ला प्रशासन कार्यालयमा निवेदन दिन अनुरोध छ,’ सूचनामा उल्लेख छ ।

निवेदन फाराम जिल्ला प्रशासन कार्यालयकै कर्मचारीले भराइ दिने प्रवन्ध गरिएको आयोगले जनाएको छ ।