मेयर बालेनको प्रश्न, अबैध संरचना भत्काउन किन दिनुहुन्न गृहमन्त्रीज्यू

काठमाडौं । देशको राजधानी काठमाडौं महानगरपालिकाका मेयर बालेन साहले गृहमन्त्री नारायणकाजी श्रेष्ठलाई सुकुम्बासी बस्ती खाली गराउन सहयोग नगरेकोबारेमा तीतो पोखेका छन् । उनले अदालतको आदेशपछि पनि किन अवैध संरचना संरक्षण गर्नुहुन्छ भन्ने प्रश्न गृहमन्त्रीलाई गरेका छन् ।

उनले सामाजिक संजाल फेसबुकमा केहीबेर अघि स्मरणका लागि भनेर लेखेका छन्–२०७६ साउन २० गते सम्मानित सर्वोच्च अदालतबाट बागमती, बिष्णुमती, मनोहरा र यिनका सहायक नदीहरुको जग्गा अतिक्रमण गरेर बनाइएका घरटहरा तथा संरचनाहरु भत्काएर नदीको स्वच्छता कायम गराउन तथा सार्वजनिक जग्गाको संरक्षण गर्न आदेश भएको थियो ।

आज फेरि उच्च अदालतले बागमती सभ्यताको विरुद्ध बस्ती नहटाउन परेको रिटमा अन्तरिम आदेश जारी नभएको अवस्था छ ।

यदि कुनै कानुनले कसैमाथि अन्याय गरिरहेको छ भने तत्काल कानुन परिवर्तन गर्न सार्वजनिक अपील गरेर प्रक्रिया सुरु गर्नुहोस् या कानुन बमोजिमको शासन व्यवस्था अँगाल्नुहोस् ।

यो तर्फ कुनै पनि कदम नचाली बैधानिक रुपमा नै यति भइसक्दा पनि कुन कानुन र नैतिकताका आधारमा यस्ता अवैध संरचना संरक्षण गर्नुहुन्छ गृहमन्त्रीज्यू ? कसरी कानुनी राज्यको अनुभूति दिलाउनुहुन्छ गृहमन्त्रीज्यू ?