नेकपा एस निकट अनेरास्ववियुद्वारा नेपाल ल क्याम्पसमा तालाबन्दी

काठमाडौं । स्ववियु निर्वाचनको मनोनयन दर्ताको २ दिनअघि नेपाल ल क्याम्पसमा अनिश्चितकालीन तालाबन्दी गरिएको छ । भर्ना भइसकेका विद्यार्थीहरुको नाम मतदाता नामावलीमा प्रकाशित नगरेको भन्दै नेपाल ल क्याम्पसमा नेकपा एकीकृत समाजवादी निकट अनेरास्ववियुले बिहीबार तालाबन्दी गरेको हो ।

नेपाल ल क्याम्पसले स्ववियु निर्वाचन प्रयोजनका लागि बिहीबार सार्वजनिक गरेको मतदाता नामावलीमा भर्ना भइसकेका सयौं विद्यार्थीको नाम नराखिएकाले तालाबन्दी गर्नुपरेको अनेरास्ववियु नेपाल ल क्याम्पस कमिटीका अध्यक्ष विशालदत्त भट्टले जारी गरेको विज्ञप्तिमा उल्लेख छ । उक्त सूची तत्काल सच्याई छुटेका मतदाताहरुको नामावली समेटेर प्रकाशित नभएसम्म अनिश्चितकालीन तालाबन्दी गरिएको भट्टले उल्लेख गरेका छन् ।

स्ववियु निर्वाचनको उम्मेदवारी दर्ता फागुन २७ गते शनिबार राखिएको छ । स्ववियु निर्वाचन आगामी चैत ४ मा हुँदैछ ।

क्याम्पसमा भर्ना भएका योग्य विद्यार्थीहरुलाई मताधिकारबाट बन्चित गर्ने क्याम्पस प्रशासन र स्ववियु निर्वाचन समितिको नियोजित षडयन्त्रप्रति अनेरास्ववियुले आपत्ति जनाएको छ । भर्ना भइसकेका विद्यार्थीको नाम नराखी मतदाता सूची प्रकाशित गर्ने कार्य अपराधिक भएको उल्लेख गर्दै अनेरास्ववियुले उक्त कार्यमा संलग्न हुने क्याम्पस प्रमुख र स्ववियु निर्वाचन अधिकृतले राजीनामा दिन र गल्ती नसच्याई निर्वाचन सम्बन्धी कुनै पनि गतिबिधि अगाडि नबढाउन अनेरास्ववियुले माग गरेको छ ।