प्रधानमन्त्री प्रचण्डविरुद्धको मुद्दा आज हेर्न नभ्याइनेमा

काठमाडौं। प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ विरुद्ध सर्वोच्च अदालतमा परेको मुद्दामा आज बिहीबार सुनुवाई नहुने भएको छ।

न्यायाधीश विश्वम्भरप्रसाद श्रेष्ठको एकल इजलासले प्रचण्डविरुद्धको रिट आज हेर्न नभ्याइने र भोलि शुक्रबारका लागि सारेको सर्वोच्चले जनाएको छ।

प्रधानमन्त्री प्रचण्डविरुद्ध अधिवक्ताद्धय ज्ञानेन्द्रराज आरण र कल्याण बुढाथोकीले मंगलबार सर्वोच्चमा रिट दायर गरेका थिए।

प्रधानमन्त्री प्रचण्डले २०७६ माघ १ गते रत्नपार्कको टुँडिखेलमा आयोजित थारु माघी महोत्सव कार्यक्रमलाई सम्बोधन गर्दै आफूले दश वर्षे युद्धकालमा भएको पाँच हजार जनाको हत्याको जिम्मा लिने बताएका थिए । सोही अभिव्यक्तिलाई मुख्य विषय बनाएर पीडितले मुद्दा दायर गरेका थिए ।

उनीहरुले उक्त द्वन्द्वकालीन मुद्दालाई लिएर प्रचण्डविरूद्ध फौजदारी अभियोगमा छानबिन र कारवाही हुनुपर्ने आदेश माग गर्दै सर्वोच्चमा रिट दिर्ता गरेका हुन्।