प्रधानमन्त्री प्रचण्डसँग सम्बन्धित रिट आज दर्ता हुँदै

काठमाडौं। प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्ड विरुद्धको रिट दर्ता हुने क्रममा छ। न्यायाधीशद्वय ईश्वरप्रसाद खतिवडा र हरिप्रसाद फुयाँलकोसंयुक्त इजलासले उक्त रिट दर्ता गर्न गत शुक्रबार आदेश दिएका थिए । सो आदेश दिएपछि मंगलबार रिट दर्ता गर्न लागिएको हो।

२०७६ माघ १ गते माघी पर्वका दिन टुँडिखेलमा आयोजित कार्यक्रममा माओवादी केन्द्रका अध्यक्ष प्रचण्डले द्वन्द्वकालमा मारिएका ५ हजारको जिम्मेवारी आफूले लिएको अभिव्यक्तिलाई लिएर अधिवक्ता ज्ञानेन्द्रराज आरणलगायतका २५ जना र कल्याण बुढाथोकी लगायतका ९ जनाले सर्वोच्चमा रिट दर्ता गर्न खोजे पनि दर्ता हुन सकेको थिएन ।

ज्ञानेन्द्रराज आरण लगायतले प्रधानमन्त्री तथा माओवादी केन्द्रका अध्यक्ष प्रचण्डविरुद्ध दायर गरेको रिट सर्वोच्च अदालतमा पेश गरिएको छ। रुजु गरेर दर्ता गर्ने क्रममा रहेको बताइएको छ।

यसअघि सर्वोच्च प्रशासनले दरपीठ गरिदिएको रिट सर्वोच्चको पछिल्लो आदेशसँगै दर्ताको प्रक्रिया सुरु भएको हो। माओवादी केन्द्रले भने द्वन्द्वकालीन विषयलाई संक्रमणकालीन न्याय अन्तर्गत टुंग्याउनुपर्ने बताउँदै आएको छ।