डा. शेखर कोइराला भन्छन्- कांग्रेसकै नेतृत्वमा अबको सरकार बन्छ  

काठमाडौँ । नेपाली कांग्रेस नेता डा. शेखर कोइरालाले कांग्रेसकै नेतृत्वमा गठबन्धनको सरकार बन्ने दाबी गरेका छन् । 

विराटनगरमा आज बिहीबार बिहान पत्रकार सम्मेलन गर्दै उनले संसदीय दलका सभापति शेरबहादुर देउवा टिमको बर्चस्व भएपनि संसदीय निर्वाचनमा आफ्नो टिमले प्रयास भने गर्ने बताए । ४ मंसिरमा सम्पन्न निर्वाचनबाट सन्तोषजनक नतिजा आएको बताउँदै उनले कांग्रेसको नेतृत्वमा नै अबको सरकार बन्ने दावी गरेका हुन् । 

‘कसैले प्रधानमन्त्री बन्ने चाहना राखेर मात्रै हुँदैन त्यसका लागि नम्बरको गेम हुन्छ भन्ने कुरा बुझ्नु जरुरी छ,’ उनले भने, ‘संसदीय दलको नेतामा जसले नम्बर पुर्‍याउँछ उसैले सरकारको नेतृत्व गर्छ र त्यसका लागि काठमाडौं जाँदै छु, साथीहरुसँग कुरा गर्छु ।’ अहिले निर्वाचित कांग्रेसका सांसदहरुमा सभापति देउवा पक्षकै बढी रहेको तर यस विषयमा सभापतिसँग कुरा गर्ने उनले बताए।