१ अर्ब ३४ करोड भन्दा बढी अवैध हुण्डी कारोबार गर्ने पक्राउ

काठमाडौं । एक अर्ब ३४ करोडभन्दा बढी अबैध हुन्डी कारोबार गरेको भेटिएपछि अजयकुमार मुखियालाई प्रहरीले मंगलबार पक्राउ गरेको छ ।

धनुषा, शहिद नगर नगरपालिका वडा नं ४ का २४ बर्षीय मुखियालाई धनुषा जिल्ला अदालतबाट पक्राउ अनुमति लिई केन्द्रीय अनुसन्धान ब्यूरो र जिल्ला प्रहरी कार्यालय, धनुषाको संयुक्त प्रहरी टोलीले पक्राउ गरेको जनाएको छ ।

केन्द्रीय अनुसन्धान ब्यूरो (सीआईबी) ले सूक्ष्म अनुसन्धान गर्ने क्रममा विभिन्न समयमा व्यक्तिगत तथा व्यावसायिक बैंक खाताहरूको प्रयोग गरी मुखियाले हालसम्म रु. १ अर्ब ३४ करोड ७८ लाख ३९ हजार १ सय ४४ बराबरको अवैध हुण्डी कारोबार गरेको पुष्टि हुन आएको जनाइएको छ ।

पक्राउ परेका मुखियामाथि हुण्डी सम्बन्धी कारोबार गर्न नहुने कसूरमा थप अनुसन्धान कार्य जारी रहेको छ । साथै यस अवैध कारोबारमा संलग्न अन्य व्यक्तिहरूको खोजी तथा अनुसन्धान कार्य तीब्रताका साथ भइरहेको सीआईबीले जनाएको छ ।