प्रहरीका घुमुवा : कर्मचारी प्रशासनको नाम लिंदै तीन वटा जिल्लामा घुम्दै

काठमाडौं । सशस्त्र प्रहरी बलले सीमा अपराध र तस्करी नियन्त्रणमा कडाइ गर्दै लामो समय एकै कार्यालयमा कार्यरत जनशक्तिको सरुवा गरेको छ । कोशी र मधेश प्रदेशदेखि लुम्बिनी र सुदूरपश्चिम प्रदेशका सीमा क्षेत्रमा लामो समय कार्यरत सशस्त्र प्रहरीहरुको सरुवा गरिएको छ ।

सशस्त्र प्रहरीका आईजीपी नारायणदत्त पौडेलले सशस्त्र प्रहरी संगठनमा परिपत्र गर्दै सीमा अपराध र तस्करी नियन्त्रणमा संलग्न भए जुनसुकै दर्जाको भए पनि कारबाही गर्ने चेतावनी दिएका छन् ।

तस्करीमा संलग्नमाथि पनि सशस्त्र प्रहरीले गम्भीर रुपमा छानबिन गरेको छ । सशस्त्र प्रहरी नेपाल नं. १ बराह बाहिनी मुख्यालय सुनसरी मातहत कार्यालयहरुमा कार्यरत तीन जनामाथि छानबिन सुरु भएको जनाएको छ । बिभिन्न बाहिनी मुख्यालयहरू मातहत सीमा सुरक्षा गुल्मका गुल्मपति तथा बिओपीका कमाण्डहरुको कार्यसम्पादन कमजोर देखिएपछि ९ जनालाई फिर्ता बोलाइएको छ ।

अनुशासनविपरीत कार्य गर्ने ६७ जना कर्मचारीहरुलाई समेत कारवाही गरिएको हो । सशस्त्र मुख्यालयले सीमामा राजश्व चुहावट, अवैध क्रियाकलाप, चोरीतस्करी नियन्त्रण कार्यलाई सुदृढ गर्न तथा आर्थिक सुशासन कायम गर्ने हेतुले एउटै जिल्लामा लामो समय कार्यरत रहेका १ हजार ८ सय ३ जना सशस्त्र प्रहरी कर्मचारीहरुलाई अन्तर जिल्ला सरुवा गरेको हो ।

सशस्त्रमा सुशासनका लागि आईजीपी पौडेलले कदम चालिसकेको भए पनि नेपाल प्रहरीभित्र भने सादा पोशाकमा परिचालित घुमुवाले सीमा क्षेत्रमा तस्करीको लाइन मिलाएर लाभ लिन छाडेका छैनन् ।

प्रहरी प्रधान कार्यालयको कर्मचारी प्रशासनमा आफ्नो मानिस छ भन्दै इलाका प्रहरी कार्यालय चन्द्रनिगाहपुरमा बरिष्ठ हवल्दार मुनिलाल गुप्ताले तुजुक देखाउने गरेको आरोप छ । गुप्ताले आफ्नो पदीय मर्यादा बिर्सेर आफ्नो कार्यालय प्रमुखलाई समेत झुटो कुरा गरी अबैध असुली गर्दैआएको आरोप छ ।

उनले ब्यापारीलाई इलाका प्रहरी कार्यालयका हाकिमको नाममा रकम माग्ने गरेका छन् । हाकिमको आदेश छ भन्दै प्रहरी कार्यालय आउन अन्यथा जे पनि हुनसक्छ भन्दै तर्साउने गरेको गुनासो ब्यापारीहरुको छ ।

गृह मन्त्रालय र प्रहरी प्रधान कार्यालयले सादा पोशाकमा प्रहरी परिचालन गर्न कडाइका साथ रोक लगाइएको छ । तर रौतहटमा गुप्ताहरु घुमुवाका रुपमा सादा पोशाकमा परिचालित हुने गरेका छन् । रौतहटका एसपी सिताराम रिजालले ध्रुव यादवलाई सुटुक्क घुमुवा राखेकोमा समाचार आएपछि मधेश प्रदेश प्रहरी कार्यालयले तानेको थियो । गुप्ताका बारेमा प्रहरीको उजुरी छानबिनमा थुप्रै उजुरी पुगे पनि बाराबाट रौतहट, सर्लाही फेरि रौतहट सरुवा हुने गरेको छ ।  प्रहरी प्रधान कार्यालयको कर्मचारी प्रशासन शाखामा आफन्त भएकाले गुप्ताले बारा, रौतहट र सर्लाहीमै घुमुवाका रुपमा दरबन्दी मिलाउने गरेका छन् ।