मिटरब्याजका डन जुवामा पक्राउ, करोडौंका चेक बाउन्समा पक्राउ पर्दै छुट्दै

काठमाडौं । मिटरब्याजको कारोबार गर्ने र लिएको रकम नतिर्ने भनेर चिनिएका प्रचण्ड खड्का जुवा खेलाउँदा खेलाउँदै शुक्रबार पक्राउ परेका छन् ।

खड्कासहित ७ जनालाई चुच्चेपाटीस्थित बरण्डा रेष्टुरेन्टबाट पक्राउ गरिएको जिल्ला प्रहरी परिसर काठमाडौंले जनाएको छ । बरन्डा रेष्टुरेन्ट प्रचण्ड खड्काकै हो । उनले आफ्नै रेष्टुरेन्टमा जुवा खेलाउने गरेको सूचनापछि प्रहरी बृत्त गौशालाले छापा मारेको थियो ।

छापा मार्दा जुवा खेलाउँदै गरेका खड्कासहित खेल्ने ७ जनालाई नियन्त्रणमा लिइएको जिल्ला प्रहरी परिसर काठमाडौंका प्रवक्ता एसपी पवन भट्टराईले जानकारी दिएका छन् । जुवा अखाडाबाट प्रहरीले ८५ हजार रकमसमेत बरामद गरेको थियो । जुवा खेलाउने खड्का र खेल्नेहरु सबै ४ दिनमै मंगलबार छुटेका छन् ।

जुवामा पक्राउ परेकाहरु पहुँच र प्रभाव नहुनेलाई सामान्यतया २४ दिनसम्म थुनामै राखिने गरिएको छ । तर मिटरब्याजी खड्का भने ४ दिनमै मंगलबार छुटेका छन् । उनीहरुको म्यादथप हुने भनिए पनि सेटिङमा छुटेका छन् ।

मिटरब्याजमा पैसाको कारोबार गर्ने खड्काबिरुद्ध दिपेश चालिसेले उजुरी दिएपछि पक्राउ परी हाजिर जमानीमा छुटेका खड्काले दिएको जाहेरीकै आधारमा प्रहरीले बैशाख ३ गते निरे भन्ने निराजन पौडेललाई काठमाडौंबाट पक्राउ गरेको थियो । एमालेको युवासंघका पौडेललाई गुण्डागर्दीको आरोपमा पक्राउ गरिएको दाबी प्रहरीले गरेको छ । तर उनलाई प्रचण्ड खड्काको मिटरब्याजको कारोबारमा पक्राउ गरिएको प्रहरी स्रोत बताउँछ ।

मिटरब्याजमा पैसा लेनदेन भएका पौडेललाई खड्काले प्रहरीसँग मिलेर गुण्डागर्दीमा पक्राउ गराएको आरोप छ । खड्काले नुवाकोटको ईंटा उद्योग र बिभिन्न होटल, रेष्टुरेन्ट देखाएर ब्याजमा लिएर नतिर्ने गरेको आरोप छ । खड्काले ईटा उद्योगदेखि आफ्नो ब्यवसायमा लगानीकर्ता बनाउने भनेरसमेत दिपेश चालिसेबाट रकम लिएका छन् । र, चालिसेलाई उनले नुवाकोटको ईटा उद्योगमा समेत लगानी गर्न लगाएका छन् ।

पछिल्लो समय ठेक्कापट्टा गर्दै आएका निराजन पौडेल मिलन चक्रे समूहमा रहेका खड्काले आईसीएफसी फाइनान्सबाट मिटरब्याजमा लेनदेन गर्ने गरेकोे आरोप छ । दिपेश चालिसे र प्रचण्ड खड्काबीच मिटरब्याजमा कारोबार भएको र खड्काले नतिरेपछि उनले जिल्ला प्रहरी परिसर काठमाडौंमा चेक बाउन्समा जाहेरी दिएका थिए ।

चालिसेलाई पनि सुरेशचन्द्र बख्रेलले चेक बाउन्समा जाहेरी दिएपछि उनी ‘फरार’ भएका थिए । तर उच्च प्रहरी अधिकृतको संरक्षण भएकाले दिपेश चालिसे काठमाडौंमै भए पनि पक्राउ पर्न नसकेको स्रोत बताउँछ । चालिसेले पनि ठूलो रकम मिटरब्याजमा लिएकाले उनका बिरुद्ध थुप्रै चेक बाउन्समा प्रहरीमा जाहेरी दर्ता छन् ।