स्रोत नखुलेको ५७ लाख प्रहरीद्वारा बरामद, श्रेष्ठ पक्राउ

काठमाडौँ । प्रहरीले काठमाडौं महानगरपालिका–१४ कुलेश्वरस्थित चुन्नेपाखा टोलबाट स्रोत नखुलेको ५७ लाख ४७ हजार ३ सय ५० रुपैयाँ बरामद गरेको छ । जिल्ला प्रहरी परिसर काठमाडौंले उक्त रकमसहित एक जनालाई पक्राउ गरेको छ ।

हुन्डी मार्फत् रकम कारोबार भइरहेको भन्ने विशेष सूचनाका आधारमा खटिएको प्रहरी वृत्त कालिमाटीको टोलीले काभ्रेपलान्चोक–नमोबुद्ध नगरपालिका–९ घर भएका र हाल कुलेश्वर बस्दै आएका ३४ वर्षीय सरोज श्रेष्ठलाई नियन्त्रणमा लिएको हो ।

तिनको साथ र बसोबास गर्ने कोठामा गरिएको चेकजाँचमा उक्त रकम फेला परेको प्रहरीले जनाएको छ ।

श्रेष्ठलाई हुन्डी सम्बन्धी कारोबार गर्न नहुने कसुरमा काठमाडौं जिल्ला अदालतबाट ५ दिनको म्याद थप अनुमति लिइ अनुसन्धान भइरहेको जिल्ला प्रहरी परिसर, काठमाडौंले जनाएको छ ।