सिँचाइका दर्जन रुग्ण ठेक्का तोडिए, सडकका थप ४० ठेक्का तोड्ने सूचना जारी

काठमाडौं । भौतिक पूर्वाधारसहित तीन वटा मन्त्रालय सम्हालेका मन्त्री कुलमान घिसिङले बर्षौंदेखि अलपत्र पारिएका ठेक्का तोड्ने क्रमलाई निरन्तरता दिएका छन् । ऊर्जा, जलस्रोत तथा सिंचाई मन्त्रालयअन्र्तगत सिँचाइतर्फका १२ रुग्ण ठेक्का तोडिएको छ ।

सिंचाई अन्तर्गत साविकको जनताको तटबन्ध कार्यक्रम फिल्ड कार्यालय नं २ जलेश्वर महोत्तरीअन्तर्गतका १२ रुग्ण ठेक्का तोडिएको छ । बबई सिँचाइ आयोजनाका ६ रुग्ण ठेक्का तोड्न ३० असोजमा १५ दिने सार्वजनिक सूचना प्रकाशित भइसकेको छ ।

ठेक्का लिने तर काम नगर्ने र आयोजना अलपत्र पार्ने प्रवृत्ति अन्त्यका लागि रुग्ण ठेक्का तोड्न मन्त्री कुलमान घिसिङले मातहतका निकायलाई निर्देशन दिएपछि तीनवटै मन्त्रालय मातहतका बिभाग र आयोजनाले ठेक्का रद्द गर्ने क्रम सुरु गरेका छन् ।

सिँचाइ तथा जलस्रोत व्यवस्थापन आयोजना, जनकपुरधामले आइतबार सार्वजनिक सूचनामार्फत् १६ जेठ २०८१ र १ साउन २०८१ मा ठेक्का अन्त्य गर्ने आशयको सूचना दिए पनि निर्माण व्यवसायीबाट सम्झौताबमोजिम काम सम्पन्न नगरी निर्माण अलपत्र पारेकाले ठेक्का अन्त्य गरिएको जनाएको छ ।

त्यसैगरी, सडक र पुल निर्माणका लागि ठेक्का सम्झौता गरी काम नगरेर बर्षौंदेखि अलपत्र पारिएका थप ४० रुग्ण ठेक्का तोड्ने प्रक्रिया सुरु भएको छ ।