महोत्तरीमा डीआईजीका घुमुवाको आतंक, गणका एसपी नै हैरान

काठमाडौं । मधेश प्रदेशका धनुषा, सिरहा, बारा, रौतहटमा तस्करी निर्वाध चलेको छ । ती जिल्लामा मधेश प्रदेशको छिन्नमस्ता बाहिनीका बाहिनीपति कृष्ण ढकालले नै जेनजी समूहको आन्दोलनको मौका छोपी विवादित घुमुवाहरु खटाएर तस्करीको लाइन चलाएको आरोप छ ।

डीआईजी ढकालका विश्वासपात्र सशस्त्र प्रहरी निरीक्षक कमलेश महतोले सेटिङ मिलाएर सशस्त्र प्रहरी गण नम्बर ९ महोत्तरीमा घुमुवा सहायक हवल्दार सन्तोष यादव र जवान सुनिल यादवलाई खटाएका थिए । जुन समाचार नेपालफेसले यसअघि नै प्रकाशित गरिसकेको छ ।

महोत्तरीको ९ नम्बर गणका एसपी शेरबहादुर अधिकारीले सबै नाकामा कडाइ गरेका छन् । नाकामा कडाइ गरेकाले तस्करीको लाइन चलाउन नपाएका बाहिनीबाट असुलीमा खटाइएका घुमुवा सन्तोष यादव र सुनिल यादवले महोत्तरीका नाका नाकामा गएर घरायसी प्रयोजनका लागि सामान ल्याउने सर्वसाधारणलाई दुःख दिने र एसपीलाई विवादमा ल्याउन खोजिरहेका छन् ।

दशैंमा खर्च उठाउन परिचालन गरिएका घुमुवा सन्तोष र सुनिलले बिहीबार पनि महोत्तरीका नाकाहरुमा पुगेर सर्वसाधारणलाई दुःख दिएका थिए । आज शनिबार पनि बाहिनीबाट परिचालित घुमुवा भन्दै उनीहरुले नाकामा आतंक सृजना गरेको आरोप छ ।

घुमुुवा यादवद्वयले सशस्त्र मुख्यालयको अनुगमनका डीएसपी सुदीप रेग्मीको समेत नाम लिएर सीमामा ताण्डव देखाएको स्रोत बताउँछ । बाहिनीबाटै खटिएका घुमुवा भएकाले आचरणबिपरीत र क्षेत्राधिकार नाघेर हर्कत देखाउँदा पनि गणपतिले एक्सन लिन सकेका छैनन् ।