काठमाडौं प्रहरीको एक्सन, गुण्डानाइके चक्रेसहित ४७ जना पक्राउ

काठमाडौं । प्रहरीले महाराजगन्ज र ठमेल क्षेत्रबाट गुण्डानाइके मिलन गुरुङ(चक्रे मिलन) सहित ४७ जनालाई पक्राउ गरेको छ । जिल्ला प्रहरी परिसर काठमाडौंले गुण्डागर्दीमा संलग्न उनीहरुलाई पक्राउ गरेको हो ।

चक्रे मिलनलाई महाराजगंजको साम्बला होटलमा जन्मदिन मनाइरहेकै बेला बिहीबार राति पक्राउ गरिएको अपराध अनुसन्धान कार्यालयले जनाएको छ । उनी यसअघि २०७४ वैशाख २६ मा पनि महाराजगन्जबाट पक्राउ परेर छुटेका थिए ।

चक्रे मिलनको समूहले राजधानीमा समुह बनाएर गुण्डागर्दी र हप्ता असुली गर्दैआएको छ । पक्राउ परेकाहरूलाई स्क्रिनिङ गरेर थप अनुसन्धान गरिने प्रहरीले जनाएको छ ।

यसअघि बिहीबार बिहान प्रहरील ठमेल नर्सिङचोकमा रहेको नगरकोट दोहोरी साँझबाट गुण्डागर्दीमा संलग्न युवराज गुरुङ उर्फ सानुभाइलाई पक्राउ गरेको थियो । उक्त दोहोरीमा विवाद गरी गुण्डागर्दी गरेपछि उनी पक्राउ परेका थिए ।

नुवाकोट ककनीका गुरुङ विगतमा कुमार घैंटे समूहमा रही गुण्डागर्दीमा संलग्न थिए ।