पराजुली र श्रेष्ठले बानियाँको पक्षमा गरेको हस्ताक्षर फिर्ता लिए, बागमती प्रदेशमा सांसद खरिदबिक्री !

काठमाडौं । बागमती प्रदेश सभाका दुई सांसदले मुख्यमन्त्री बहादुरसिंह लामाविरूद्धको अविश्वास प्रस्तावमा गरेको हस्ताक्षर फिर्ता लिएका छन् ।

साउन ९ गते अविश्वास प्रस्तावमा हस्ताक्षर गरेका सांसदद्वय मिना पराजुली र माया श्रेष्ठले आफूलाई जानकारी नै नगराई हस्ताक्षर गराइएको भन्दै नाम फिर्ता लिएका छन् । इन्द्रबहादुर बानियाँलाई

मुख्यमन्त्री बनाउनका लागि लामाबिरुद्ध हस्ताक्षर गरेका सांसदद्वय पराजुली र श्रेष्ठ ४ दिनमै लामाकै पक्षमा देखिएका छन् । लामालाई मुख्यमन्त्रीबाट हटाउने पक्षमा २४ सांसद देखिएका थिए ।

मुख्यमन्त्री लामाले अविश्वास प्रस्ताव सामना गर्ने भन्दैआएका छन् । उनलाई दबाब दिन मिनकृष्ण महर्जन लगायतका ४ मन्त्रीले राजीनामा दिएका थिए । तर पनि मुख्यमन्त्री राजीनामा नदिई अविश्वास प्रस्ताव सामना गर्ने पक्षमा देखिएका थिए । बानियाँ पक्ष हटाएरै छाड्ने र लामा राजीनामा नदिएर अविश्वास प्रस्तावको सामना गर्न तयार भएपछि कांग्रेसमा सांसद खरिदबिक्री हुन थालेको चर्चा हुन थालेको छ ।

मुख्यमन्त्री लामा जसरी पनि बहुमत सिद्ध गर्न लागेको र उनले पराजुली र श्रेष्ठलाई प्रलोभन दिएर हस्ताक्षर फिर्ता लिन लगाएको बानियाँ पक्षले आरोप लगाउन थालेको छ । प्रदेशमा लामा र बानियाँबीच सांसद तानातान गर्ने क्रममा १ करोडसम्मको चलखेल भएको स्रोत बताउँछ ।

थप दुई सांसदले हस्ताक्षर लिएपछि कांग्रेस संसदीय दलमा लामाको पक्षमा बहुमत पुग्नेछ ।