मन्त्री अधिकारी मानवतस्करीमा मुछिए, एमाले कार्यकर्ता नै मानवतस्करीका योजनाकार

विराटनगर । मानवतस्करीमा मुछिएपछि कोशी प्रदेशका आन्तरिक मामिला तथा कानुन मन्त्री लिलाबल्लभ अधिकारीले राजीनामा दिएका छन् । मोरङ–२ को प्रदेशसभा–२ बाट निर्वाचित नेकपा एमालेका प्रदेशसभा सदस्य अधिकारी मुख्यमन्त्री हिक्मत कार्कीका निकट मानिन्छन् ।

एक संस्थाले मन्त्री अधिकारीलाई जापान भ्रमणमा लाने क्रममा तीन जना युवालाई जापानमा पुर्याएर उतै छाड्न लागेको सूचना पाएपछि जापानले उनीहरुलाई डिपोर्ट गरिसकेपछि यो प्रकरणको लहरो तान्दा पहरो नै आएको हो ।
मन्त्री अधिकारी सरकारको अनुमति नलिई जापान भ्रमणमा गएको बिषय सार्वजनिक भएपछि एकपछि अर्को तथ्य खोतल्दै जाँदा जापानमा मानवतस्करीको रहस्य पर्दाफास भएपछि मुख्यमन्त्री हिक्मत कार्कीले उनलाई बोलाएर राजीनामा दिन लगाएका छन् । एमालेबाट मन्त्री भएका अधिकारी मुख्यमन्त्री कार्कीनिकट मानिन्छन् ।

मन्त्री अधिकारीले गएको कात्तिक ११ गतेदेखि १५ गतेसम्म जापान भ्रमण गरेका थिए । आफ्नै क्षेत्रका कार्यकर्ताको विश्वासमा जापान गएका मन्त्री अधिकारीसँग हङकङमा ट्रान्जिटको बेला उनीसँगै कार्यक्रममा सहभागी हुन हिँडेको भन्दै तीन जना नेपाली भेट्न आएपछि उनी झस्किन पुगेका थिए ।

अधिकारीलाई जापानको टोकियो महानगरपालिकाको कार्यक्रममा सहभागी हुनका लागि निम्तो आएको भनेर आयोजकले लगेका थिए । उनलाई जापान जाने व्यवस्थापन मोरङकै एक एमाले कार्यकर्ताले गरेका थिए । ती एमाले कार्यकर्ताले नक्कली कागजात बनाएर मन्त्रीको आडमा मानवतस्करी गर्न खोज्दा अधिकारीसहित मुख्यमन्त्री कार्कीसमेत विवादमा परेका छन् । मानवतस्करीका योजनाकार मोरङ एमालेका कार्यकर्ताको नाम भने प्रहरीले खुलाउन चाहेको छैन ।

तीन जनालाई जापान लैजाने भनेर पैसा उठाएको खुलासा भएपछि मन्त्री अधिकारीले हङकङबाटै नेपाल प्रहरीको बिशेष ब्यूरोका डीआईजी राजन अधिकारीलाई जानकारी गराएको दाबी गरेका छन् ।
मन्त्रीसँगै जापान जानेहरुमा खोटाङ घर भएका ३६ वर्षीय दावा शेर्पा, खोटाङकै जनक राई र रसुवा घर भएका २२ वर्षीय कञ्चन देवकोटा छन् । कात्तिक १४ मा टोकियोस्थित जापानको अध्यागमन कार्यालयले उनीहरुलाई डिपोर्ट गरेको थियो ।

काठमाडौँ विमानस्थलमा ओर्लिएपछि उनीहरुलाई अध्यागमन कार्यालय र त्रिभुवन विमानस्थल सुरक्षा कार्यालयले नियन्त्रणमा लिएर उपत्यका अपराध अनुसन्धान कार्यालयलाई जिम्मा लगाइसकेको छ । र, प्रहरीले अनुसन्धान गरिरहेको छ ।