२५ लाख काण्डमा एसपी तानिए, घुमुवाहरू यथावत असुलीमै

काठमाडौं । जिल्ला प्रहरी कार्यालयका मोरङमा काजसरुवा गरिएका एसपी राजन लिम्बुको काज रद्द भएको छ । शुक्रबार मोरङका प्रमुख (एसपी) नवराज कार्कीलाई ८ महिनामै तानेर लिम्बुलाई काजसरुवा गरिएको थियो । अनलाइन जुवामा २५ लाख घुस लिएको गुनासो आएपछि एसपी कार्कीलाई प्रहरी प्रधान कार्यालयले ८ महिनामै तानेको बताइएको छ ।

कार्कीलाई तानेर खटाइएका लिम्बुको काजरद्द गरी सुनसरीको दुहबी गणमा कार्यरत एसपी नारायण चिमौरियालाई मोरङमा काजसरुवा गरिएको छ । उनी यसअघि डीएसपी हुँदै सुनसरीमा केही महिना निमित्त प्रहरी प्रमुख भएका थिए । चिमौरिया डीएसपी हुँदा रौतहट, बानेश्वर बृत्तमा कार्यरत रहेका थिए । बानेश्वर बृत्तदेखि रौतहट र सुनसरीको डीएसपीमा हुँदा पनि उनको रेकर्ड भने त्यति राम्रो थिएन । तिनै चिमौरियालाई मोरङको प्रहरी प्रमुखमा काज गरिएको छ ।

अनलाइन जुवा कारोबारीसँग आर्थिक लेनदेन गरेको भेटिएपछि एसपी कार्कीसहित मोरङमा कार्यरत प्रहरी निरीक्षक विक्रमबहादुर भट्टराई, हवल्दार राजकुमार श्रेष्ठ, सहायक हवल्दार सरोज श्रेष्ठ र इलाका प्रहरी कार्यालय बेलबारीमा कार्यरत हवल्दार खगेन्द्र राउत प्रदेश प्रहरी कार्यालय तानिएका छन् । प्रहरी निरीक्षक भट्टराई भने भर्खरै तालिम सकेर पदस्थापन भएका थिए । उनको संलग्नता नभए पनि तानिएका छन् ।

तर बेलबारीमा १२ बर्षदेखि घुमुवाका रुपमा जुवा अखाडामा सेटिङ गर्ने सहायक हवल्दार उत्तम कार्की तानिएका छैनन् । अर्का सहायक हवल्दार सुवास चौधरीलाई तानिए पनि उत्तम कार्की तानिएका छैनन् । कार्की दरबन्दी अन्यत्र भए पनि १२ बर्षदेखि बेलबारी, उर्लाबारी मात्र होइन, ७० किलोमिटर टाढा बिराटनगरमा समेत आएर गजल रेष्टुरेन्टहरुबाट एसपीका लागि हप्तावारी उठाउने गरेको स्रोत बताउँछ । यस्ता विवादित घुमुवालाई आईजीपी सचिवालयले तानेको छैन ।

त्यसो त पूर्वी क्षेत्रको रंगेली क्षेत्रमा १० बर्षभन्दा बढी समयदेखि घुमुवाको रुपमा कार्यरत प्रनानि भुवन श्रेष्ठलाई समेत तानिएको छैन । भुवन श्रेष्ठको टोलीले चिनीदेखि कपडा र हार्डवेयर ब्यापारीसँग तस्करीको सेटिङ गर्ने गरेको समाचार नेपालफेसले उजागर गरे पनि कोशी प्रदेशका डीआईजी चन्द्रकुवेर खापुङले समेत संरक्षण गरेका कारण उनीहरु अहिले पनि यथावत छ । २५ लाख काण्डमा एसपी कार्की तानिए पनि काजमा कार्यरत घुमुवाहरु अझै पनि असुलीमै छन् ।

धेरै घुमुवाहरुको सरुवा गरेको आईजीपी सचिवालयले बेलबारी–उर्लाबारी क्षेत्रका विवादित घुमुवा कार्की र रंगेली क्षेत्रमा तस्करीको नेटवर्क चलाउने भुवन श्रेष्ठलाई भने अहिलेसम्म पनि छुट दिएको छ । जबकि उनीहरुको दरबन्दी पनि अन्यत्रै रहेको छ । दरबन्दीमा पठाउने आईजीपीको अभियानसमेत प्रदेशका डीआईजी खापुङले नै असफल पार्ने काम गरेका छन् ।