घुसखोर नापीका हाकिम मिश्रको नालीबेलीः एसएलसीदेखि बीएस्सीसम्मका सबै प्रमाणपत्र नक्कली !

राजबिराज । घुस माग्दा नदिएपछि सेवाग्राही प्रमोद साह राणालाई फिल्डबुक च्यातेको झुटो आरोप लगाई प्रहरी बोलाएर पक्राउ गराएपछि विवादमा तानिएका नापी कार्यालय सप्तरीका प्रमुख सुमनकुमार मिश्र जनआक्रोश थामिनसक्नुभएपछि काठमाडौं भाग्नुपरेको छ ।

मिश्रले आफैंले २ नम्बर नापी टोलीका कर्मचारी रामु राउतलाई फिल्डबुक च्यात्न लगाएर फसाउने नियतले राणालाई प्रहरी बोलाएर पक्राउ गराएपछि नागरिकहरु नापी कार्यालय घेराउ गरी बिरोध प्रदर्शनमा उत्रिएपछि नापी हाकिम मिश्र काठमाडौंमा भागेका छन् ।

जुन कार्यालयमा कार्यरत रहँदा पनि सेवाग्राहीलाई हप्काउने, सताउने र घुस नलिएसम्म कुनै पनि काम नगर्ने प्रबृत्तिका प्रमुख नापी अधिकृत मिश्रले सप्तरीमा प्रमोद शाह राणालाई दुःख दिने र झुटा मुद्दामा फसाउन खोजेका थिए । प्रभु साह अध्यक्ष रहेको आजपाका केन्द्रीय सदस्य राणा गएको भदौ १८ गते रामपुरमजुवा वडा नम्बर ३ को ब्लक नम्बर २६२ अन्तर्गतको मोहम्मद अनबरको जग्गा दर्ताका लागि सहजीकरण गर्न गएका सप्तरीको २ नम्बर नापी टोलीमा गएका थिए । टोलीका कर्मचारी रामु राउतले अनवरको जग्गा दर्ता गर्न मानेनन् । ठूलो रकम घुस मागे । उनले कार्यालय प्रमुख मिश्रको नाम लिएर घुस मागेका थिए । प्रमोदले प्रक्रियासम्मत काममा किन घुस दिन भनेर अडान लिए ।

प्रमोदले घुस दिन नमानेपछि २ नम्बर नापी टोलीका प्रमुखलाई सप्तरी नापीका प्रमुख मिश्रले फिल्डबुक आफैं च्यात्न लगाए । सरकारी कागज कर्मचारीलाई नै च्यात्न लगाएर प्रहरीकोमा रिपोर्ट गरी शाहलाई पक्राउ गराइयो । कार्यालय प्रमुख मिश्रले आफ्नै कर्मचारीलाई फिल्डबुक च्यात्न लगाएर सेवाग्राही प्रमोदलाई पक्राउ गराएपछि नागरिक आक्रोशित भई गएको भदौ २३ गते नापी कार्यालय सप्तरी घेराउ गरे ।

प्रमुख जिल्ला अधिकारीकोमा ज्ञापनपत्र दिनेदेखि  हीबार(असोज १० गते) गृहमन्त्री रमेश लेखकलाई पनि ध्यानाकर्षण गराएपछि नापी कार्यालय सप्तरीका प्रमुख मिश्र काठमाडौं भागेका छन् । उनी पुनः सप्तरी फर्किन भूमिब्यवस्था मन्त्रालयमा मन्त्री र सचिवकोमा धाइरहेका छन् ।
सेवाग्राहीमैत्री ब्यवहार नगर्ने कर्मचारीका रुपमा मिश्र चिनिन्छन् ।

घनुषामा कुटाइ खाएर लखेटिए, गैरकानुनी रुपमा इनारको जग्गा दर्ता 

यसअघि नापी कार्यालय धनुषाको प्रमुख हुँदा सेवाग्राहीलाई प्रक्रियासम्मत काममा घुस मागेपछि कुटाइ नै खाएर मिश्र लखेटिनुपरेको थियो । धनुषा नापीको प्रमुख हुँदा मिश्रले सार्वजनिक इनारको जग्गा व्यक्तिको नाममा गैरकानुनी रुपमा दर्ता गरेका थिए । अनुचित लाभ लिएर जनकपुरधाम उपमहानगरपालिका २१ को सार्वजनिक इनारलाई नै लुप्त बनाएर ब्यक्तिको नाममा दर्ता गरेपछि ब्यापक बिरोध भएको थियो ।

सार्वजनिक इनारको ९ धुर जग्गा कार्यालय प्रमुख मिश्रले घुस लिएर जगदीश झाको नाममा दर्ता गरेका थिए । नापी टोली प्रमुख दिलीपकुमार साह र नापी कार्यालय प्रमुख मिश्रले मोटो रकम लिएर सार्वजनिक इनार रहेको ७ धुर जग्गा थप गरी १६ धुरको प्रमाण पुर्जा बनाएको स्थानीयले प्रमाणसहित सार्वजनिक गरेपछि उनी सप्तरीमा सरुवा भएका थिए ।

०६९ कार्तिक २० मा इनारको जग्गा दर्ता रोक्न मागसहितको निवेदन नापी कार्यालयमा दर्ता भएको थियो । तर त्यो निवेदनदेखि सबै प्रमाण भए पनि मोटो रकम घुस लिएर मिश्रले दर्ता गरेपछि उनी विवादमा तानिएका थिए ।

सबै प्रमाणपत्र नक्कली, सेवाग्राही सताउँदै घुस असुली

नेपालमा सबैभन्दा बढी नक्कली प्रमाणपत्र पेश गरी जागिर खाने नेपाली सेनामा थिए । दरबारको आडमा राणा शाहले आफ्ना पुल्पुलिएर नपढेका सन्तानलाई भारतबाट प्रमाणपत्र किनेर ल्याउँदै जागिर खुवाएका थिए । सेनामा त त्यस्ता नक्कली प्रमाणपत्रधारीहरु प्रायः बाहिरिसकेका छन् । तर नापी विभाग अन्तर्गत भने अझै पनि केही नक्कली प्रमाणधारीहरुको चकचकी छ । अख्तियार दुरुपयोग अनुसन्धान आयोगले त्यस्ता नक्कली प्रमाणपत्रधारीहरुको खोजी गर्नुपर्ने देखिन्छ । यस्तै एसएलसीदेखि बीएसएसीसम्मकै नक्कली प्रमाणपत्र पेश गरी प्रमुख नापी अधिकृत(उपसचिव) भइसकेका कर्मचारी हुन्, सुमनकिशोर मिश्र । उनले नक्कली प्रमाणपत्र पेश गरी २०५९ माघदेखि २०६१ जेठसम्म सिनियर नापी तालिम लिएका थिए । तालिम लिएपछि २०६२–०६३ मा पोखरामा अमिनमा नापी बिभागको जागिरमा प्रवेश गरे । त्यसपछि सर्भेक्षक भए ।

२०६८ मा नापी अधिकृत भएर डिल्लीबजार नापी कार्यालयमा सरुवा मिलाए । पढ्दै नपढी बीएस्सीको प्रमाणपत्र ल्याएर २०७७ मा प्रमुख नापी अधिकृतमा बढुवा हुन सफल भए । प्रमुख नापी अधिकृत भएपछि बर्दिया पदस्थापन भए पनि गएनन् । हाल लोसपाका अध्यक्ष महन्थ ठाकुरको सोर्स लगाएर नगई पदस्थापन समेत संशोधन गराएका थिए । उनी महन्थ ठाकुरको नातेदार भएकै आधारमा सधैं भनेको ठाउँमा सरुवा गराउँदैआएका छन् ।

धनुषामा कुटाइ खाएर सप्तरी नापी कार्यालयमा सरुवा भएपछि पनि उनको घुसखोर बानीमा कुनै परिवर्तन हुन सकेन । उल्टै फिल्डबुक आफैं कर्मचारीलाई च्यात्न लगाएर सेवाग्राहीलाई फसाउन खोज्दा जनता आक्रोशित भएर संघीय सरकारका गृहमन्त्रीसम्म कुरा पुगेको छ ।

राजबिराजमा सेवाग्राहीलाई झुटा मुद्दा लगाउनेमात्र होइन, उनले सप्तरीका गाउँ–गाउँमा ब्लक नापी गरी दर्ता गर्न प्रतिकित्ता १० लाख रुपैयाँ दरले पैसा उठाउन बिचौलियाहरुलाई परिचालन गरेको आरोप पनि लाग्दैआएको छ । सेवाग्राही फसाउन खोज्दा जनआक्रोश बढेपछि सप्तरीबाट भागेका प्रमुख नापी अधिकृत मिश्रले सचिवदेखि मन्त्री र कर्मचारी प्रशासन महाशाखाका सहसचिवसमेतलाई बुझाउनुपर्छ भनी सप्तरी नापी कार्यालयका कर्मचारीहरुबाट २ लाखका दरले उठाएको आरोप छ । अमिनसँग १ लाख र सर्भेक्षक र नापी अधिकृतसँग २ लाखका दरले उठाएको गुनासो कर्मचारीले गरेका छन् । सरुवा रोक्नका लागि उनले उक्त घुस संकलन गरेको आरोप छ ।

एसएलसी(म्याट्रिक)देखि आईएसी र बीएस्सीसम्मको प्रमाणपत्र नक्कली पेश गरी जागिर खाएका मिश्र ४ बाक्य राम्रोसँग बोल्न र लेख्न समेत नजाने पनि धनुषा वा सप्तरी जहाँ गए पनि पहिलाका कार्यालय प्रमुखको कमजोरी खोतल्ने र उनीहरुको बिरुद्ध पोल लगाउने काममा भने निपूर्ण नै मानिन्छन् ।

सप्तरी नापीबाट सेवाग्राही फसाएर विवादमा तानिएका बिभाग तानिएका उनी मन्त्रालयमा मन्त्री र सचिवलाई कुरा लगाएर फेरि फर्कने र घुसको खेती गर्ने खेलमा छन् ।

डिल्लीबजारमा नापी अधिकृतदेखि धनुषा र सप्तरी कार्यालयको प्रमुख भइसकेका मिश्रले अनिवार्य क्लास लिनुपर्ने आईएस्सी र बीएस्सीको जागिर खाँदै कसरी प्रमाणपत्र ल्याए ? अख्तियारले उनले कुन कलेजमा हाजिर भएर पढे, त्यो खोजी गरे उनको प्रमाणपत्र नक्कली भएको खुल्ने उनीमातहत काम गरेका एक नापी अधिकृत नै नेपालफेसलाई बताउँछन् ।

कार्यालय प्रमुख मिश्रको भनाइ

नापी कार्यालय सप्तरीका प्रमुख सुमनकिशोर मिश्रले फिल्डबुक च्यात्न लगाएर प्रमोद साह राणालाई फसाएको र पक्राउ गराएको कुरा अस्वीकार गरेका छन् । उनले भने–‘म काजमा एक साताका लागि काठमाडौं आएको हुँ । फिल्डबुक च्यात्न लगाएर कर्मचारी पक्राउ गराएको छैन । जग्गा अदालतमा मुद्दा परेकाले दर्ता नगरिएको हो । नापी कार्यालयले विज्ञप्ति निकालेको छ । सबै त्यसमा उल्लेख छ ।’ एसएलसीदेखि सबै प्रमाणपत्र नक्कली पेश गरी जागिर खाँदैआएकोबारेमा उनले हप्काउँदै भने–‘फोन राख्नु्स् । म कुरा गर्दिनँ ।’