माधव नेपाललाई भेट्न प्रचण्ड र ओली पुगे कोटेश्वर, सरकारमा आउन आग्रह

काठमाडौं । नेकपा (एमाले), माओवादी, रास्वपा र जसपासहितको नयाँ सत्ता गठबन्धनमा नेकपा एकीकृत समाजावादीलाई पनि ल्याउने प्रयासमा नेताहरु लागेका छन् ।

नेकपा एमालेका अध्यक्ष केपी शर्मा ओली र प्रधानमन्त्री पुष्पकमल दाहाल ‘प्रचण्ड’ मंगलबार नेकपा एकीकृत समाजावादीका अध्यक्ष माधवकुमार नेपाललाई भेट्न कोटेश्वर पुगेका छन् ।

प्रधानमन्त्री प्रचण्डले नेपाललाई एमाले अध्यक्ष ओलीसँगै कोटेश्वर आउने जानकारी गराएका थिए । त्यसको केहीबेरमा प्रचण्ड र ओलीे माधव नेपाल निवास कोटेश्वर पुगेका हुन् । प्रचण्ड र ओलीसँगै एमालेका उपाध्यक्ष विष्णुप्रसाद पौडेल पनि माधव नेपालको निवासमा पुगेका छन् ।

नेपाली कांग्रेस नेतृत्वको गठबन्धन तोडेर प्रचण्ड एमालेतिर लागेपछि एकीकृत समाजवादीले कुनै निर्णय गरिसकेको छैन । माओवादी केन्द्रका अध्यक्ष एवं प्रधानमन्त्री प्रचण्डले भने सोमबार पनि अध्यक्ष नेपालको निवासमै पुगेर छलफल गरेका थिए । मन्त्रालय भागबण्डामा रास्वपाका अध्यक्ष रवि लामिछानेले गृहमन्त्रालय मागिरहेका छन् ।

प्रधानमन्त्री प्रचण्ड भने रविलाई गृहमन्त्रालयबाहेक दिने पक्षमा छन् । मन्त्रालय भागबण्डामै कुरा नमिलेको अवस्थामा नेकपा एकीकृत समाजवादीलाई पनि सरकारमा आउनका लागि आग्रह गर्न ओली–दाहाल कोटेश्वर पुगेका छन् ।