नयाँदिल्ली,(एजेन्सी) २५ चैत ।
भारतले अमेरिकी राष्ट्रपति डोनाल्ड ट्रम्पले कोरोना भाइरस संक्रमितहरुको उपचारका लागि वरदान सावित हुनसक्ने भन्दै हाइड्रोक्सीक्लोरोक्वाइन नामक औषधिको निर्यात फुकुवाका लागि गरेको अनुरोध मंगलवार स्वीकार गरेको छ । ट्रम्पले यदि सो औषधि निर्यात नगरिएको खण्डमा प्रतिकार गर्ने चेतावनी दिएको केहि घन्टा पछि भारत सरकारले यो निर्णय गरेको हो । हुन त ट्रम्पले यसअघि नै भारतिय प्रधानमन्त्री मोदीसंग यसका लागि पहल गरेका थिए ।
भारतले ट्रम्प र अमेरिकाको प्रसंग नै उल्लेख नगरीकन कोराना भाइरस पीडित मुलुकहरुलाई आफूले सुलभ ढंगले यो औषधि उपलब्ध गराउने जनाएको छ । तर चिकित्सा विशेषज्ञहरुले भने हाइड्रोक्सीक्लोरोक्वाइनले कोरिभड–१९ को उपचार हुने कुनै प्रमाण नभएको बताइरहेका छन् । हाइड्रोक्सीक्लोरोक्वाइन औलो विरुद्धको चर्चित र पुरानो औषधि क्लोरोक्वाइनसंग मिल्दाजुल्दो छ ।
