सुशासन समितिबाट पारित भयो ठेकेदार, मन्त्री, कर्मचारीको ढिलासुस्तीमा अनुगमन गर्ने विधेयक

काठमाडौं । अनुगमन तथा मूल्यांकन सम्बन्धमा व्यवस्था गर्न बनेको विधेयक राज्य व्यवस्था तथा सुशासन समितिले पारित गरेको छ । समितिले आज प्रतिवेदनसहित सर्वसम्मतिले उक्त विधेयक पारित गरेको समितिका सभापति रामहरि खतिवडाले जानकारी दिए ।

“समितिको अघिल्लो बैठकबाटै हामीले सहमति जुटाएर पास गर्ने भनेका थियौँ । आज सामान्य भाषा मिलाउन मात्र केहीबेरका लागि बैठक बसेका हौँ । विधेयक सर्वसम्मतिले पारित भयो,” उनले भने ।

उक्त बैठकको निर्णय सुनाउँदै उनले विधेयक संसद्‌बाट पारित भइसकेपछि ढिलासुस्ती गर्ने, आयोजना प्रमुख, ठेकेदार कम्पनी, कार्यालय प्रमुख, सरकार वा मन्त्रीमाथि अनुगमन गर्न सहज हुने बताए ।

उनका अनुसार विधेयक बुधबारपछि बस्ने संसद् बैठकमा पेस गर्ने तयारी गरिएको छ ।

“भोलि नै सदनमा पेस गर्ने तयारी थियो । तर, भोलि शीर्ष नेता बोल्ने र पूर्व सांसद तथा हाम्रै पार्टीका केन्द्रीय सदस्यको निधनमा शोक प्रस्ताव पारित गर्नुपर्ने भएपछि पेस गर्ने सक्ने अवस्था रहेन । अर्को बैठकमा हामी पेस गर्छौं,” उनले भने ।