२ लाख ५० हजार घुससहित सर्भेक्षक यादव पक्राउ, कार्यालय प्रमुख साह भागे

ललितपुर । सेवाग्राहीको काम गरिदिने भनेर नापी कार्यालय ललितपुरका सर्भेक्षक रामवीर यादवसहित ३ जना २ लाख ५० हजार रुपैयाँ घुससहित पक्राउ परेका छन् ।

सेवाग्राहीको काम गर्नका लागि घुस मागेको सूचना पाएपछि अख्तियार दुरुपयोग अनुसन्धान आयोग टंगालबाट खटिएको टोलीले मंगलबार कार्यालय समयपछि अपराह्न ४.२० मा कार्यालयबाटै सर्भेक्षक यादवसहित लेखापढी ब्यवसायी दिनेश बन्जारा र विनोद अधिकारीलाई नियन्त्रणमा लिएको हो । सेवाग्राहीसँग २ लाख ५० हजार रुपैयाँ घुस लिइसकेपछि अख्तियारको टोलीले उनलाई नियन्त्रणमा लिएको आयोगको विज्ञप्तिमा उल्लेख छ ।

कार्यालय समय ४ बजे हो । तर सर्भेक्षक यादव कार्यालय समयपछि ४.२० बजेसम्म कार्यालयमा बसेर सेवाग्राहीसँग घुस लिएर काम गर्न तल्लीन थिए । सोही समयमा अख्तियारको टोलीले उनलाई नियन्त्रणमा लिएको छ । ललितपुर नापी कार्यालयका प्रमुख उमेशकुमार साहले ती सेवाग्राहीसँग घुसको डिल गरेका थिए ।

अख्तियारको टोली कार्यालय प्रमुख साहले नै घुस मागेको सूचना पाएर गएको थियो । तर आयोगको टोली कार्यालयमा प्रवेश गर्नासाथ कार्यालय सहयोगी सावित्री बमले हतार हतार सूचना दिएपछि उनी मास्क लगाएर भागेका थिए । साहले नै सर्भेक्षक यादवलाई सेवाग्राहीसँग घुस लिएर काम गर्न निर्देशन दिएको प्रष्ट भइसकेको छ ।

कार्यालय प्रमुख साहले ललितपुर नापीमा आएपछि प्रत्येक कर्मचारीलाई दैनिक ५० हजार न्यूनतम घुस असुली गरेर बुझाउनका लागि दबाब दिएपछि कर्मचारीहरु महाभारतमा अभिमन्यू चक्रब्यूहमा परेजस्तै परेका छन् । कार्यालय प्रमुखकै टर्चरले गर्दा कर्मचारीहरु सेवाग्राहीहरुसँग असुली गर्न बाध्य भएको र अख्तियारले रामवीरलाई मंगलबार पक्राउ गरेको हो, ललितपुर नापीका एक कर्मचारीले भने ।

कार्यालय प्रमुख साहले भूमिब्यवस्था मन्त्री रन्जिता श्रेष्ठ, उनका पीए सरोज बुुढाथोकी, निजी सचिव बसन्त पुरीलाई बुझाउनुपर्छ भनेर सर्भेक्षकदेखि नापी अधिकृतहरुलाई दररेट तोकेर उठाउन निर्देशन दिएकै कारण कर्मचारी फन्दामा परेका छन् । मंगलबार पनि कार्यालय प्रमुखकै सेटिङमा सेवाग्राहीसँग घुसको मोलतोल भए पनि उनी भागेपछि सर्भेक्षक यादव र लेखापढी ब्यवसायीमात्र पक्राउ परेका छन् ।

भूमिब्यवस्था मन्त्रालयले गएको असोजमा कार्यालय प्रमुख साहहलाई धनुषा सरुवा गरे पनि उनी उच्च अदालतमा रिट दायर गरी सबैतिर सेटिङ गरी अन्तरिम आदेशका भरमा टिकिरहेका छन् । अख्तियारले २ लाख ५० हजार घुससहित नियन्त्रणमा लिएका सर्भेक्षक यादव भक्तपुर नापी कार्यालयबाट महोत्तरी भएका थिए ।

महोत्तरीबाट गएको असोजमा फेरि उपत्यकाकै ललितपुरमा सरुवा भएर आए । राष्ट्रिय कर्मचारी संगठनका अध्यक्षलाई पैसा बुझाएर उनी पुनः उपत्यकामा सरुवा भएर आएका हुन् । १० लाख बुझाएर उनी पुनः उपत्यकाको ललितपुरमा सरुवा भएर आएका थिए । एकातिर कार्यालय प्रमुख साहले दैनिक ५० हजार घुस बुझाउनू भनेको र अर्कोतिर ललितपुर आउन भट्टलाई १० लाख खर्च गरेकाले त्यो उठाउन उनले सेवाग्राहीलाई पार्नुसम्म अप्ठेरो पारी घुस असुली गर्दैआएका थिए ।