बालकुमारीबाट पक्राउ परेका ७३ जनालाई छाडिँदै, मुद्दा नचलाइने

काठमाडौं । ललितपुरको बालकुमारीमा शुक्रबार आन्दोलनका क्रममा पक्राउ गरिएका ७३ जनालाई छाड्ने तयारी गरिएको छ । उनीहरूलाई आफन्तको जिम्मा लगाएर छाड्न लागिएको जिल्ला प्रहरी परिसर ललितपुरले जानकारी गराएको छ ।

उनीहरूलाई शनिबारै छाडिनेछ । पक्राउ गरिएका ७३ जनामाथि कुनै मुद्दा नचलाउने निर्णय गरिएको प्रहरी स्रोतले जानकारी गरायो ।

रोजगार अनुमति प्रणाली (ईपीएस)को आवेदन फाराम भर्न नपाएको भन्दै असन्तुष्ट युवाको समूहले शुक्रबार बालकुमारीस्थित ईपीएस कार्यालयअगाडि प्रदर्शन गरेको थियो । मन्त्रीको गाडीमा आगजनी समेत गरिएको थियो ।

उक्त प्रदर्शनकारी र प्रहरीबीच झडप भएको थियो । त्यसक्रममा अछामको चौरपाटी गाउँपालिका–१ का २१ वर्षीय वीरेन्द्र शाह र दैलेखको महाबु गाउँपालिका–६ का २३ वर्षीय सुजन राउतको मृत्यु भएको थियो ।

मृतकको शव पाटन अस्पतालमा राखिएको छ । दुवै शव आफन्तले बुझ्न बाँकी छ ।