त्रिभुवन विमानस्थलबाट १४ किलो अवैध सुनसहित एक जना पक्राउ

काठमाडौं । त्रिभुवन विमानस्थलबाट १४ किलो अवैध सुनसहित एक जना पक्राउ परेका छन् । भन्सार कार्यालयले त्रिभुवन विमानस्थलबाट बिहीबार राति १४ किलो सुनसहित उनलाई पक्राउ गरेको हाे ।

पक्राउ पर्नेमा ४५ वर्षीय चन्द्र घले रहेका छन् । बिहीबार राति ११ः५६ बजे फ्लाइ दुबईको एफजेट ५७३ उडान नम्बरको जहाजबाट आएका घलेको साथबाट १४ किलो परिमाणको सुन बरामद गरिएको प्रहरीले जनाएको छ ।

सुराकीको आधारमा भन्सार प्रमुख डा टोकराज पाण्डेको नेतृत्वमा खटिएको टोलीले मध्यराति उक्त परिमाणको बिस्कुट आकारको सुन बरामद गरेको हो । प्रहरीका अनुसार घलेले सुनको प्लेट बनाएर शरीरमा राखेर सुन ल्याएका थिए ।

चन्द्र घलेको साथबाट बरामद भएको सुन गोरखाका मीनबहादुर घलेको भएको प्रारम्भिक अनुसन्धानबाट खुलेको छ । घटनामा अन्य व्यक्ति पनि संलग्न हुनसक्नेबारे अनुसन्धान भइरहेको प्रहरीले बताएको छ ।