रवि लामिछानेको चुनौतीः एनसेलको लाभकर छलीमा कुन कुन नेताले कति रकम पचाए, छानबिन गरौं

काठमाडौं । बेलायतमा दर्ता गरेको सतिशसाल आचार्यको र स्पेक्ट्रलाइट यूके लिमिटेडले ६ अर्ब रुपैयाँमा एनसेल खरिद गरेको बिषय चौतर्फी बहस भइरहेको छ ।

एनसेलमा विदेशी कम्पनीको ५० प्रतिशत भन्दा कम लगानी भएको देखाएर सरकारको स्वामित्वमा जान नदिने चलखेलमा सतिशलाल आचार्य थिए । त्यसै रणनीति अन्तर्गत आजियाटा कम्पनीबाट ६ अर्बमा खरिद गरेको देखाई २०८५ मा एनसेललाई सरकारको स्वामित्वमा जानबाट रोक्ने खेलमा आचार्य छन् ।

चन्द्र ढकालको ग्लोबल आईएमई बैंकमा ४० अर्ब ऋण रहेको एनसेल ६ अर्बमा बिक्री गर्ने कुरा विश्वसनीय हुनै नसक्ने भन्दै चौतर्फी बिरोध भइरहेको छ ।

सरकारमा रहेका पार्टीहरुले पनि एनसेल बिक्रीको बिषयलाई गम्भीर रुपमा लिएको छन् ।  एनसेलको खरिद अपारदर्शी देखिएको सत्ता गठबन्धनले ठहर गरेको छ । एमाले औपचारिक रुपमा बोलेको छैन । एमाले निकट अनेरास्ववियुले एनसेल कौडीको मूल्यमा बिक्री गरेको बिषयलाई लिएर सडकमा प्रदर्शन भने गरेको छ ।

यसैबीच, राष्ट्रिय स्वतन्त्र पार्टीले पनि मुख खोलेको छ । रास्वपाका अध्यक्ष रवि लामिछानेले टेलियासोनेराले आजियाटालाई एनसेल बिक्री गर्दा भएको लाभकर छलीको छानबिन गर्न चुनौती दिएका छन् । उनले लाभकर नतिर्न एनसेलबाट कुन कुन नेताले कति खाए छानबिन गर्न तयार हुने हो भन्ने प्रश्न गरेका छन् ।

लामिछानेले लेखेका छन्–‘एनसेल स्पाइस नेपालको नाममा अहिलेको एनसेल जन्मँदादेखि नै चलखेल थियो । टेलियासोनेराले बेचेर मलेसियाली कम्पनीले किन्दा नियमानुसारको ट्याक्स तिर्न नपर्ने आश्वासनका नाममा कुन कुन दलका कुन कुन नेताले कति कति रकम खाए, कुन कुन निकायका दैला दैलामा बाँडे र पचाए, खुला छानबिन गर्न तयार हुने हो ??’