राज्यविरुद्धको कसुरमा विप्लवविरुद्ध पक्राउ पुर्जी जारी भएपछि नेकपाद्वारा आन्दोलन घोषणा

काठमाडौँ। नेपाल कम्युनिष्ट पार्टीका महासचिव नेत्रविक्रम चन्द‘विप्लव’ लगायत पार्टीका शीर्ष नेताहरु विरुद्ध जिल्ला अदालत काठमाडौँले पक्राउ पुर्जी जारी गरेको विराधेमा उक्त पार्टीले आन्दोलन घोषणा गरेको छ ।

सरकारसँग भएको सम्झौताविपरीत विप्लवविरुद्ध पक्राउ पुर्जी जारी गरेको भन्दै नेकपाले आन्दोलन घोषणा गरेको हो ।

आन्दोलन अनुसार आज मसाल जुलुस प्रदर्शन गर्ने, भोलि न्यायाधीशको पुत्ला जलाउने र २१ गते २ बजे देशव्यापी जनप्रदर्शन गर्ने कार्यक्रम तय भएको छ ।

जिल्ला अदालत काठमाडौंले विप्लवसहित सो पार्टीका नेताहरू खड्गबहादुर विश्वकर्मा प्रकाण्ड, माइला लामा तथा राजु कार्कीविरुद्ध ३५ दिने पक्राउ पुर्जी जारी गरेको छ ।

अदालतको सूचनाअनुसार उनीहरूविरुद्ध राज्यविरुद्धको कसुरमा पक्राउ पुर्जी जारी भएको हो ।