बाणिज्य बिभागमा डीजी र निर्देशकबीच विवादः बजार अनुगमन ठप्प

काठमाडौं । बाणिज्य, आपूर्ति तथा उपभोक्ता संरक्षण बिभागका महानिर्देशक तीर्थराज चिलुवाल हाजिर भएको ३ महिना नपुग्दै सरुवा माग्न थालेका छन् । उनलाई उद्योग, बाणिज्य तथा आपूर्ति मन्त्रालयले गएको भदौ अन्तिममा बाणिज्य विभागको महानिर्देशक बनाएको थियो ।

तीन महिना पनि नपुग्दै उनी सरुवा हुन पाउँ भन्दै धाउन थालेका छन् । ७१ सहसचिवको सरुवा हुँदा आफ्नो नाम पनि सूचीमा राख्न पहल गरेका उनी पर्न नसकेपछि बाणिज्य मन्त्रालय फर्कने चाहना सचिव समक्ष राखेका छन् ।

उपसचिव हुँदासम्म राजस्व समूहमा बसेर तर मारेका र अख्तियार दुरुपयोग अनुसन्धान आयोगमा गएका उनी रामचन्द्र भट्टमार्फत् बाणिज्यमा सरुवा भएका थिए । बाणिज्यमा उनलाई सुपारी र केराउ खुलाउनेगरी डीजी बनाइएको थियो । सुपारी र केराउको अनुमति दिए । तर त्यसमा डीजी चिलुवालले लाभ र जस नपाएपछि उनी त्यहाँबाट बाहिरिन खोजेको बताइन्छ । त्यसको जस र लाभ मन्त्रालयका सहसचिव रामचन्द्र तिवारी, सचिव मुकुन्द निरौला र मन्त्री रमेश रिजालले मात्र लिएको र डीजी चिलुवाल जिल्लिएका थिए । उनी बाहिरिन खोज्नुको यो मात्र होइन, आफ््नै उपसचिव आनन्दराज पोखरेलसँगको टसल पनि मानिएको छ ।

बाणिज्य विभागको महत्वपूर्ण शाखाको रुपमा रहेको आपूर्ति, अनुगमन तथा उपभोक्ता संरक्षण शाखाका निर्देशक पोखरेलको पछिल्लो समयमा डीजी चिलुवालसँग द्वन्द्व हुँदैआएको छ । पोखरेलले बजार अनुगमनका क्रममा पक्षपाती ब्यवहार गर्ने, अनावश्यक रुपमा सेवाग्राहीलाई दुःख दिने गरेको, साना साना त्रुटिमा समेत ब्यापारीहरुमाथि नचाहिने दण्ड जरिवाना तोकी आतंकित पारेको आरोप छ ।

त्यस्तै, ब्यापारीहरुबाट अनुचित लाभ लिने गरेको, मातहतका कर्मचारीहरुप्रति रुखो ब्यवहार गर्ने गरेको लगायतका बिषयमा पोखरेलबिरुद्ध गुनासो पुगेपछि डीजी चिलुवालले सम्झाउने प्रयास गरेका थिए । तर डीजीको निर्देशनपछि पोखरेलको कार्यशैली नसच्चिएपनि चिलुवाल थप विवादमा पर्ने देखेर बाहिरिन खोजेको विभाग स्रोत बताउँछ । अहिले महानिर्देशक र निर्देशकको द्वन्द्वका कारण विभागको बजार अनुगमनको काम प्रायः ठप्प नै छ ।

दशैं तिहारमा चिनीमा भएको कालोबजारीको अनुगमनका नाममा नचाहिंदो चर्चा बटुलेको विभागले बजारको विद्यमान अस्तब्यस्ततालाई चिर्नका लागि कुनै ठोस कार्ययोजना बनाउन सकेको छैन । पोखरेलले सचिव मुकुन्द निरौलाको साथ सहयोग पाएको संकेत पाएपछि चिलुवाल विभागमा बस्न नचाहेको बताइन्छ । पोखरेललाई अर्को शाखाको जिम्मेवारी दिन खोजे पनि मन्त्रालयकै दबाबका कारण चिलुवाल रोकिन पुगेका छन् । उनी विभागमा कहिलेकाहीमात्र आउने, हाजिर गरेर मात्र हिंड्ने गरेका छन् ।

महानिर्देशक र निर्देशकको समन्वय अभावका कारण विभागको अनुगमनको कामकारबाही ठप्प हुन प्ुगेको छ । बिराटनगर बाणिज्य कार्यालय बीरगंज बाणिज्य कार्यालय हुँदै विभागमा आएका पोखरेलसँग फर्म दर्ताको अनुभव भए पनि बजार अनुगमनको बारेमा त्यति धेरै ज्ञान छैन । बाणिज्य बिभागका यसअघिका निर्देशक डम्मरु निरौलाको पछिल्लो चर्तिकला सेलाउन नपाउँदै फेरि महानिर्देशक र निर्देशकको द्वन्द छताछुल्ल हुन पुगेको छ ।