पूर्वसांसद आलमको मुद्दामा लिखित बहस नोट पेस गर्न आदेश

काठमाडौं । राजपुर बम विस्फोट काण्डका आरोपी तत्कालीन सांसद एवं नेपाली नेपाली कांग्रेसका नेता महोम्मद आफताब आलमको मुद्दा १५ दिनपछि सरेको छ । रौतहट जिल्ला अदालतबाट बुधवार न्यायाधीश बाबुकाजी बानियाको एकल इजलासले दुई बुँदे आदेश दिएसँगै मुद्दा १५ दिनपछि सरेको हो ।

न्यायाधीश बानियाँको इजलासले दुवै तर्फका वकिलले लिखित बहस नोट र महान्यायाधिवक्ताको कार्यालयबाट मुद्दा नचल्ने निर्णयको रिपोर्ट, सर्वोच्चबाट मुद्दा चल्ने भएपछि साक्षी बकपत्रसहितको टिपोट १५ दिन भित्र पेस गर्न आदेश दिएकाे छ । बुधबार दिउँसो बहस सकेपछि न्यायाधीश बानियाले दुई बुँदे आदेश दिएका हुन्।

पहिलो संविधान सभाको पूर्वसन्ध्यामा राजपुरमा बम विस्फोटन भएको थियो। सो विस्फोटनमा ठुलो मानवीय क्षति भएको तथा राजा चिम्नी उद्योगमा जिउँदै मानिस जलाएको आरोप आफताब आलमसहित ७ जना माथि लागेको थियो ।

२०७६ सालमा पुनः उक्त मुद्दामा आलमलाई पक्राउ गरी थुनछेक बहस हुँदा निजलाई पुर्पक्षका लागि कारागार चलान गर्ने निर्णय भएको थियो।