अस्तव्यस्त रुपन्देहीको सुरक्षाः पेस्तोल देखाएर साढे ५ लाख लुटपाट

बुटवल । रुपन्देही जिल्लाको मर्चवार क्षेत्रमा पेस्तोल देखाएर ५ लाख ५० हजार रुपैयाँ लुटपाट भएको छ ।

भारतीय नम्बरको मोटरसाइकलमा रहेका अज्ञात समूहले सम्मरीमाई गाउँपालिका–६ मा श्रीप्रकाश बरईलाई पेस्तोल देखाएर साढे ५ लाख रुपैयाँ लुटपाट गरेका छन् । लुटेरा समूह पेस्तोल देखाएर लुटपाट गरी फरार भएको पीडित बरईका दाइ एंव मर्चवारी गाउँपालिकाका अध्यक्ष गया प्रसाद बरईले बताए ।

रुपन्देहीको इलाका प्रहरी कार्यालय मर्चवारका प्रहरी निरीक्षक रेशम पौडेलले भैरहवाको नबिल बैंकबाट रकम झिकेर रायपुरतर्फ जाँदै गर्दा रकम लुटपाट भएको बताए । उनले रकम लुटेको खबर पाउन साथ लुटेरा समुहको खोजतलास जारी राखेको बताए ।

रुपन्देहीको सुरक्षा चुस्तदुरुस्त नहुदाँ अपराधीको मनोबल बढ्दै गएको छ । जसका कारण जिल्लामा बम बिष्फोटन, हत्या, लुटपाट, चोेरी, फिरौती माग लगायतका अपराध बढ्दै गएका छन् ।
जिल्लामा शान्ति सुरक्षा कायम राख्नमा रुपन्देहीका एसपी भरत बहादुर विक असफल देखिएका छन् ।

सरुवा भएका घुमुवा प्रहरी सहायक निरिक्षक पवन जिसीलाई काखी च्यापेर तस्करी, क्यासिनो लगायतबाट असुली धन्दा चलाउँदा जिल्लाको शान्ति सुरक्षामा असर पर्न थालेको हो । अपराध नियन्त्रणका लागि खटिएका घुमुवाहरु जिल्लामा अपराध नियन्त्रण गर्नुभन्दा तस्करी गराउनमा तल्लिन छन् । तर, पनि आईजीपी बसन्त कुवँर र लुम्बिनी प्रदेशका डिआईजी उमेशराज जोशी चुपचाप छन् ।