नेकपाकै नेता भन्छन्–सेनालाई ब्यापारमा सामेल नगरियोस्

काठमाडौं, २० चैत । कोरोना भाइरस संक्रमण रोकथामका लागि सरकारले स्वास्थ्य सेवा विभागमार्फत् टेण्डर गरी खरिद गरेको सबा अर्ब रुपैयाँको मेडिकल उपकरण अति महंगो भएको भनी चर्को आलोचना भएपछि सरकारले सम्झौता रद्ध गरी आपूर्तिकर्ताको धरौटीबापतको ५ करोड रुपैयाँ जफत गरेको जानकारी दिइसकेको छ । मेडिकल उपकरणका कारोबारका लागि दर्ता नै नभएको र यसअघि कामै नगरेको ओम्निटेक इन्टरनेशनलसँग खरिद सम्झौता रद्द गरेपछि सरकारले गभर्मेन्ट टु गभर्मेन्ट(जी टु जी) मार्फत् खरिद गर्ने र त्यसमा सेनालाई संलग्न गराउने कुरा बिहीबारदेखि चर्चामा आएको छ ।

सेनालाई मेडिकल उपकरण खरिद प्रक्रियामा सहभागी गराउँदा अख्तियार दुरुपयोग अनुसन्धान आयोगको दायरामा नपर्ने भएकाले सरकारले यस्तो गर्न लागेको आशंका पनि गर्न थालिएको छ । 

सेनालाई खरिद प्रक्रियामा सहभागी गराउनु नहुने आवाज नेकपाभित्रै उठेको छ । नेकपाका नेता डा. बिजय पौडेलले सामाजिक संजाल फेसबुकमा लेखेका छन्– ‘सरकारससँग सरकारले सम्झौता गरी जीटुजी खरिद गरेर सामान ल्याउने हो भने सेनालाइ नमिसाउँदा राम्रो । सेना ब्यापारमा सामेल नहोस् । ब्यापार हैन र अनुदान हो भने सेनालाइ जिम्मा दिन हुन्छ । कमसे कम सेना त भ्रष्टाचारको आरोपबाट जोगियोस् ।’