आठ लाख नगद र लागुऔषधसहित पाँच जना पक्राउ

काठमाडौं । मकवानपुरमा नगद ८ लाख र लागुऔषधसहित पाँच जना पक्राउ परेका छन् । उनीहरुलाई मकवानपुरको मनहरी गाउँपालिका- ६ नयाँबस्तीबाट पक्राउ गरिएको हो ।

पक्राउ पर्नेमा मकवानपुरको कैलाश गाउँपालिका- ८ बस्ने ३१ वर्षीय विकास मोक्तान, ३५ वर्षीय रामबहादुर स्याङबो, पर्साको ठोरी गाउँपालिका- ८ बस्ने ३२ वर्षीय जीतबहादुर चापागाईं, मकवानपुरको मनहरी गाउँपालिका- ४ रमनटार बस्ने ३० वर्षीय रामचन्द्र गोले र २० वर्षीय दालबहादुर मोक्तान रहेका छन् ।

नयाँ बस्तीस्थित कच्ची बाटोमा प्रदेश ३-०३-००१ प ४५४१ नम्बरको मोटरसाइकलसहित बसिरहेका उनीहरुलाई ६०२ बोतल कोडिन फास्फेट, २० ग्राम चरेस र नगद ८ लाखसहित पक्राउ गरिएको जिल्ला प्रहरी कार्यालय मकवानपुरले जनाएको छ ।