लकडाउन उल्लंघन गर्ने २ सयभन्दा बढी प्रहरी नियन्त्रणमा

काठमाडौं, २० चैत । सरकारले कोरोना संक्रमण फैलिन नदिन चैत ११ देखि घोषणा गरेको बन्दाबन्दी(लकडाउन)को आदेश उल्लंघन गर्ने क्रम रोकिन सकेको छैन । सरकारले कोरोना महामारी फैलिन नदिनका लागि यसको पालना गर्न आग्रह गर्दै आए पनि काठमाडौं उपत्यकामा त्यसको उल्लंघन हुन छाडेको छैन ।

नागरिककै स्वास्थ्यको सुरक्षाका लागि सरकारले लकडाउन घोषणा गरेको भन्ने समेत हेक्का नराखी उल्लघन गर्नेहरुको संख्या बढिरहेको छ । बेलुकाको समयमा  खाद्यान्न लगायतका अत्यावश्यक सामग्री खरिदका लागि जानू भने पनि भीडभाड गरेपछि सरकारले बिहान मात्र खुला गर्ने निर्णय बुधबार गरेको छ । 

प्रहरीले लकडाउन उल्लंघन गर्नेहरुलाई नियन्त्रणमा लिने र होल्ड गराउने गरिरहेको भए पनि उपत्यकामा लकडाउन उल्लंघन गर्नेहरुको संख्या उत्तिकै छ । काठमाडौं उपत्यकामा आज बिहान बिहानै लकडाउन उल्लंघन गर्ने साढे दुई सय बढीलाई प्रहरीले नियन्त्रणमा लिएको छ ।