इजलास नै रोकेर उद्योग विभागका डीजी तीजको रमझममा

काठमाडौं । तीज आउन एक साता बाँकी छ । तर उद्योग विभागमा भने एक हप्ताअघि नै रमझमका साथ सोमबार दिउँसो तीज मनाइएको छ ।

सोमबार दिउँसो २ बजे विभागको सभाहलमा तीज कार्यक्रम राखिएको थियो । उद्योग विभागका महानिर्देशक बाबुराम गौतमको निर्देशनमा प्रशासन शाखाकी निर्देशक रमिला भण्डारीले तीज कार्यक्रमको ब्यवस्थापन सम्हालेकी थिइन् । कार्यालय समयभित्रै विभागकै प्रांगणमा तीज कार्यक्रम सांगीतिक माहौलसहित राखिएको थियो ।

विभागका कर्मचारीलाई तीज लागेपछि सेवाग्राहीहरु मारमा परेका थिए । विभिन्न काम लिएर जाने सेवाग्राहीहरु तीज कार्यक्रम भएकाले रुष्ट भएर फर्किएका थिए । कतिपय कर्मचारीहरु कार्यालय परिसरमा कार्यक्रम राखिए पनि सहभागी भएनन् भने कतिपय बाध्यताले सहभागी भएका थिए । विभाग नजिकै रहेको क्यान्टिनमा सहभागीहरुलाई खानपिनको ब्यवस्था गरिएको थियो । २० किलो कुखुराको मासु पकाउन क्यान्टिनमा आदेश दिइएको थियो ।

पुलाउ लगायत बिभिन्न परिकारहरु हलमा ब्यवस्था गरिएको थियो । सोमबार बिहानैदेखि महानिर्देशक गौतमले दैनिक कार्यक्रमलाई रद्द गरेर तीज कार्यक्रममा सहभागी भएका थिए । उनैको निर्देशनमा आज राखिएका आधा दर्जन मुद्दाका पेशीहरु तीज कार्यक्रममा सहभागी हुन रद्द गरिएको थियो । काठमाडौं बाहिरबाट मुद्दाको पेशीका लागि आएका सेवाग्राहीहरु इजलास रद्द गरिएपछि आक्रोशित भई फर्किएका थिए ।

यसैगरी, मंगलबार दिउँसो १ बजे ७ सदस्यीय टोलीको नेतृत्व गर्दै महानिर्देशक गौतम जीआईजेडको कार्यक्रममा भाग लिन थाईल्याण्ड र बंगलादेशको भ्रमणमा जाँदैछन् । विभागका निर्देशकहरु रमिला भण्डारी, शंकर धामी, शान्ता मरासिनीसमेत सो कार्यक्रममा जाँदैछन् ।

महानिर्देशक गौतमका विश्वासपात्र निर्देशक मनोज रेग्मी भने गतहप्ता नै जेनेभा उडिसकेका छन् । विदेश भ्रमणको पूर्वसन्ध्यामा इजलास नै रद्द गरेर तीज कार्यक्रम गर्न निर्देशन दिएका गौतमले आफूलाई सुशासन र आर्थिक मितब्ययिताको पक्षधर भएको दाबी गर्न छाडेका छैनन् ।

गौतमले विदेश जाँदाजाँदै अनुमति शाखाका शाखा अधिकृत गृस्मा शर्मालाई ६ महिना नपुग्दै ट्रेडमार्क शाखामा सरुवा गरेका छन् ।

महानिर्देशक गौतमले निर्देशक रमिला भण्डारीलाई विदेशी लगानी शाखाको निर्देशक बनाउनका लागि प्राविधिक समूहको दरबन्दी कटौती गर्न उद्योग मन्त्रालयमा सिफारिस गरिसकेका छन् । विदेशी लगानी शाखाको दरबन्दी प्राविधिक समूहको उपसचिवको नेतृत्वमा रहँदैआएको छ । उक्त शाखाका अधिकृत लीला काफ्लेको डिजाइनमा भण्डारीलाई सो शाखामा लान लागिएको विभागमा चर्चा छ ।