आरजु देउवाले हालिन् अमरेश सिंहविरुद्ध गालीबेइज्जती मुद्दा, आइतबार पेशी

काठमाडौँ। सत्तारुढ नेपाली कांग्रेसकी केन्द्रीय सदस्य डा. आरजु राणा देउवाले स्वतन्त्र सासंद डा. अमरेश कुमार सिंहविरुद्ध गालीबेइज्जती तथा मानहानिको मुद्दा दर्ता गरेकी छन् ।

गत जेठ २६ गते देउवाले सिंहलाई विपक्षी बनाई जिल्ला अदालत काठमाडौंमा गालीबेइज्जती मुद्दा दर्ता गरेको आरजुनिकट स्रोतले लोकान्तरलाई जानकारी दियो ।

स्रोतका अनुसार रिट निवेदनमा अमरेशलाई हदैसम्मको कारवाही गर्न माग गरेकी छिन् ।

जिल्ला अदालतमा दर्ता मुद्दाको सुनुवाइ पेशी असार २४ गते तोकिएको छ ।

पछिल्लो समय अमरेशले आरजुलाई ‘गणतन्त्रकी पम्फादेवी’को संज्ञा दिँदै आएका थिए । देशका ठूला भ्रष्टाचार काण्डमा आरजुको संलग्नता रहेको आरोपसहित अमरेशले सञ्चार माध्यममा अन्तवार्ता दिँदै हिँडेका थिए ।

सभापति शेरबहादुर देउवा र आरजुले आफूलाई टिकट नदिएको भन्दै अमरेश रुष्ट थिए ।

अमरेशविरुद्धको रिट निवेदनमा उनले सञ्चार माध्यममा दिएका अभिव्यक्तिलाई समेत समावेश गरिएको छ । रिटसँगै प्रमाणको रूपमा अडियो, भिडियोसमेत आरजुले पेश गरेकी छन् ।