समाचारको यथार्थ नबुझी लेखिएकोमा अर्यालको आपत्ति

यही मिति २०८० असार ९ गतेका दिन आकर्षक मिडिया प्रा.लि. अनामनगर मच्छिगल्ली, काठमाडौंबाट सञ्चालित नेपाल फेस डटकम (www.nepalface.com) अनलाईनले प्रकाशन गरेको ‘जनप्रतिनिधि नै काठ तस्करीमा मुछिए, मेयरसहित कांग्रेसका नेताहरुको दवाव प्रहरीद्वारा अस्वीकार’ शीर्षकको समाचारमा मसँग कुनै सम्बन्ध नरहेको विषयमा मेरो नाम जोडी समाचार प्रकाशन भएकोप्रति मेरो गम्भीर ध्यानाकर्षण भएको छ ।

म रामपुर नगरपालिका–८ स्थित आफ्नै घरमै रहेर स्वच्छ व्यवसाय गरी बसिरहेको मलाई फरार भनी लेख्नु, विधि र प्रक्रिया पूरा गरेर कारोवार गर्दै आइरहेको व्यक्तिलाई थाहै नभएको अवैध काठको विषयसँग जोडेको कुराले मेरो व्यक्तिगत चरित्रहत्या, सामाजिक र आर्थिक रुपमा ठूलो क्षति भएको महसुस गरेको छु ।

वैधानिक रुपमा मात्र काठको कारोवार हुनु पर्छ भन्ने पक्षमा वकालत गर्दै आइरहेको व्यक्तिलाई हालसम्म स्रोत नखुलेको काठको विषयमा के कति कारणले कुन आधारमा समाचारमा फरार भनेर मेरो नाम जोडिएको हो ? यदि जोड्नुपर्ने अवस्थामा मलाई के कति कारणले नसोधी सत्य, तथ्य जानकारी नलिई समाचार प्रकाशन गरिएको हो ? प्रश्नको जवाफ अपेक्षा गर्दछु ।

यस समाचारले म स्वयंम, घरपरिवार, छरछिमेक, आफन्त शुभेच्छुक र समुदाय नै आश्चर्य र भ्रमित भएको हुँदा यसले नकारात्मक सन्देश प्रवाह भएको छ । फलस्वरुप प्रकाशित शीर्षकको समाचारको यथार्थ बुझी पुनः प्रकाशन गर्न म विनम्र अनुरोध गर्दछु । यदि यस विषयलाई गम्भीर रुपमा नलिई पुनर्लेखन नगरेमा कानुनी उपचार खोज्न बाध्य हुनेछु । आशा छ, तपाईले यस विषयलाई गम्भीर रुपमा लिई समाचार लेखनको क्रममा भएको त्रुटिलाई स्वीकार गरी अनावश्यक भ्रमको निराकरणमा सहयोग गर्नुहुनेछ भन्ने अपेक्षा राखेको छु । साथै भूलसुधार गरी पुनः वास्तविक समाचार प्रकाशन गर्नुहुनेछ भन्ने विश्वास लिएको छु ।

मुक्तिप्रसाद अर्याल, रामपुर नगरपालिका–८, पाल्पा

खण्डनको पत्र