भारत र तेस्रो मुलुकबाट आएकाहरुको खोजीनीति कहिले गर्ने सरकार ?

काठमाडौं, १४ चैत ।

भारत र अन्य तेस्रो मुलुकबाट नेपाल भित्रिएका नागरिक र उनीहरुको सम्पर्कमा आएका मानिसलाई स्थानीय, प्रदेश र संघीय सरकारको रेखदेखमा होम क्वारेन्टाइन र संभावित संक्रमितको ब्यवस्थापन छिटो गरी महामारीबाट जोगाउन ढिला भइरहेको छ ।

सामाजिक संजालमा सरकारले कोरोना संक्रमण रोक्ने प्रभावकारी पूर्वतयारी नगरेका गुनासा आउन थालेका छन् । सामाजिक संजालमा आएका केही प्रतिनिधिमूलक गुनासा यहाँ राखेका छौं

ज्वरो, लगातार सुख्खा खोकी, छात्ती दुख्नेलाई संघ अन्तर्गत को बिपिकेएचआई धरान, वीर अस्पताल र टेकु को राष्ट्रिय प्रयोगशालामा परीक्षणको लागि पठाई महामारीबाट बचाउनेतिर सरकार लागिहाल्नुपर्नेछ । साथै उपचारमा संलग्न स्वास्थ्यकर्मीहरुलाई सुरक्षाको ग्यारेन्टी नगरे थप जोखिम बढ्ने छ ।

कोरोनाको उपचार गर्ने एकमात्र सरुवा रोग अस्पतालका चिकित्सक र नर्सकै लागि ब्यक्तिगत सुरक्षा सामग्री(पर्सनल प्रोटेक्न इक्युपेन्ट) नै नभएका कुराहरु सार्वजनिक भएका छन् । पीपीईसमेत सरकारले ब्यवस्था नगरी सरकारी र प्राइभेट अस्पतालमा कोरोना जाँच भनेर सरकारले भनिरहेको छ । पीपीईको ब्यवस्था गर्न किन ढिला भइरहेको छ ? सरकारले जवाफदेहिता देखाउन सक्नुपर्छ ।

स्वास्थ्य तथा जनसंख्या मन्त्री भानुभक्त ढकालले पत्रकारको भीड जम्मा गरेर सरकार गम्भीर छ भनेर हुँदैन, ब्यवहारमा देखिने काम गर्नुपर्छ । सरुवा रोग अस्पतालमा त पीपीई ब्यवस्था गर्न नसक्ने स्वास्थ्य मन्त्रालयले अस्पतालहरुमा कोरोना परीक्षण हुन्छ भनेरमात्र हुँदैन । पहिला त स्वास्थ्यकर्मी नै सुरक्षित हुने वातावरण सृजना गरेपछि मात्र जाँच गर्न अस्वीकार गरेमा कारबाही गर्ने कुरा पनि जायज मान्न सकिन्छ ।