बेलैमा अन्तर्राष्ट्रिय उडान रोकेको भए…

काठमाडौं, १० चैत ।  

फ्रान्स हुँदै चैत ४ मा काठमाडौं आएकी १९ बर्षीया नेपाली विद्यार्थीमा कोरोनाको संक्रमण पुष्टि भएको छ ।  सोमबार स्वास्थ्य तथा जनसंख्या मन्त्री भानुभक्त ढकालले फ्रान्सबाट नेपाल आएकी नेपाली विद्यार्थीमा कोरोनाको संक्रमण पुष्टि भएको जानकारी गरी दिएका छन् । बेलैमा अन्तर्राष्ट्रिय उडान नरोकेका कारण पनि नेपालमा कोरोना संक्रमित यात्रु आउन सफल भएका छन् । नेपालमा अहिलेसम्म कोरोना संक्रमित एक जना निको भएर फर्किसकेका थिए । अरुमा देखिएको थिएन । 

चैत ४ गते कतारबाट काठमाडौँ आएको उक्त विमानका अरू यात्री को को थिए ? उनीहरूको अवस्था के छ होला ? उनीहरुमा पनि कोरोना भाइरसको संक्रमण थियो कि थिएन भन्ने प्रश्न उठेको छ । मन्त्री ढकालले कोरोना संक्रमित ती युवतीसँग विमानमा आएकाहरुको खोजी भइरहेको बताएका छन् । तर ती यात्रुमा कोरोना संक्रमण भइसकेको रहेछ भने अरु कतिमा सरिसक्यो होला भन्ने गम्भीर प्रश्न  उठेको छ । 

कोरोना भाइरसले विश्वमा महामारीको रुप लिइसकेपछि अन्तर्राष्ट्रिय उडान बन्द नगरेका कारण कतार हुँदै संक्रमित युवती नेपालमा आउन सफल भएकी हुन् ।  उनी सवार जहाजमा रहेका अरु यात्रुलाई पनि कोरोना संक्रमण भएको भए त्यसले कति जनामा संक्रमण भइसकेको होला ? सरकारले बेलैमा अन्तर्राष्ट्रिय उडान नरोक्दा नेपालमा कोरोना संक्रमित यात्रु प्रवेश गरेको भन्दै सामाजिक संजालमा रोष प्रकट हुन थालेको छ ।  

कोरोनाले विश्वमा महामारीको रुप लिइसक्दा पनि केही दिनअघिसम्म कतार, हङकङ, चीन, बैंकक, मलेसिया, दुबईलगायतका अन्तर्राष्ट्रिय उडान नियमित नै थिए ।