सरकारद्वारा कोरोना प्रभावितको उपचारका लागि ५० करोडको कोष स्थापना

काठमाडौं, ९ चैत । सरकारले कोरोना भाइरसबाट संक्रमित हुने बिरामीको उपचारका लागि ५० करोडको कोरोना उपचार कोष स्थापना गर्ने निर्णय गरेको छ । नेपालमा अहिलेसम्म कोरोना संक्रमणका बिरामी नभेटिए पनि जोखिममा रहेका कारण सरकारले कोष स्थापना गर्ने निर्णय गरेको छ । 

मन्त्रिपरिषदको आइतबारको बैठकले ५० करोडको कोरोना उपचार कोष स्थापना गर्ने र त्यसमा नेपाल सरकारका मन्त्रीहरुले एक महिनाको तलब योगदान दिने निर्णय गरेको हो । यस्तै मन्त्रिपरिषदले सशस्त्र प्रहरीको बलम्बुमा रहेको अस्पताललाई उपचार कक्षका रूपमा विकास गर्ने निर्णय गरेको छ ।

बलम्बुमा रहेको यो अस्पताल अन्य अस्पतालको तुलनामा एकान्तमा रहेको र भीडभाड कम हुने भएकाले कोरोना उपचारका लागि तयार गर्ने निर्णय मन्त्रिपरिषदले गरेको हो ।

आइतबार बसेको मन्त्रिपरिषद बैठकले आपूर्ति व्यवस्थापन सहज बनाउन सम्पूर्ण निकायबीच समन्वय गर्ने पनि निर्णय गरेको एक मन्त्रीले जानकारी दिएका छन् ।

यसैगरी, सरकारले एक सातासम्म चीन र भारतको नाकाबन्दी गर्ने निर्णय गरेको छ । मन्त्रिपरिषदको यो निर्णय सोमबार बिहान १० बजेटबाट लागू हुने बैठकमा सहभागी एक मन्त्रीले जानकारी दिएका छन् । भारतमा कोरोनाको संक्रमण बढेको र भारतबाट फर्किएका बीरगंजका एक ब्यापारीमा कोरोना संक्रमण भेटिएको कुरा सार्वजनिक भइसकेको छ ।