काठमाडौं । पछिल्लोसमय काठमाडौं उपत्यकामा कोरोना संक्रमण ह्वात्तै बढेको छ । काठमाडौंका कतिपय क्षेत्रमा कोरोना डढेलोको रुपमा फेलिएको पाइएको छ ।
कोटेश्वरस्थित असर्फी टोलमा भने डढेलो झैं कोरोना फैलिएको पाइएको छ । गत साउन १८ मा सो टोलका किराना पसल सञ्चालकमा चार जनामा कोरोना पुष्टि भएको थियो । उनीहरुमा कोरोना देखिएसँगै आसपासका घरमा बस्नेको स्वाब संकलन गरी परीक्षण गर्दा थप १३ जनामा कोरोना पोजेटिभ देखिएको छ ।
योसँगै सो टोललाई नै सिल गरिएको छ । कन्ट्याक्ट ट्रेसिङ गर्दा अन्यमा जुन अनुपातमा संक्रमण देखिएको छ, त्यसलाई भयावह भनिएको छ ।
आइतबार सो टोलका १३ जनामा कोरोना पुष्टि भएको थियो । तीमध्ये १० जनालाई कीर्तिपुर र टेकुस्थित अस्पतालमा आइसोलेसनमा राखिएको छ। तीन जनालाई भने उनीहरूकै घरमा आइसोलेसनमा राखिएको छ ।
