कोरोनाको त्रासले भारतबाट नेपाल भित्रनको ताँती

महेन्द्रनगर, ८ चैत । नेपालमा कोरोना भाइरस संक्रमण अहिलेसम्म देखिएको छैन तर भारतमा कोरोना भाइरसको संक्रमण फैलन थालेपछि रोजगारीमा गएका नेपालीहरु पश्चिमी नाका गड्डाचौकी हुँदै भित्रिने क्रम बढेको छ ।

अहिले गड्डाचौकी नाका हुँदै भारतबाट नेपाल आउनेहरुको भिड थामिनसक्नु गरी बढेको छ । सीमा नाकामा कोरोना जाँचका लागि हेल्थ डेस्क स्थापना गरिएको छ । तर, उपकरण अभावका कारण सर्वसाधरणले घण्टौंसम्म लाइनमा बस्नु पर्ने वाध्यता देखिएको छ । 

भारतमा काम गरिरहेका बझाङका हरिप्रसाद बोहरा घर फर्कंनका लागि शनिबार बिहान ६ बजेतिर पश्चिमी नाका गड्डाचौकी आइपुगेका थिए । सीमा नाकामा राखिएको हेल्थ डेक्समा स्वास्थ्य जाँचपछि मात्रै नेपाल छिर्न पाइने भएकाले उनी लाइनमा बसे । ११ बजेसम्म पनि उनको पालो आएको थिएन । घर आउँदा बोकेर ल्याएका सामानसहित उनी र उनका साथीहरु झण्डै ६ घण्टा लाइनमा बसे स्वास्थ्य जाँचका लागि ।

उनी जस्तै भारतबाट स्वदेश फर्किरहेका मानिसहरुको लर्को थियो नाकामा नाकामा । भारतमा कोरोना भाइरस संक्रमण फैलिँदै गएपछि नेपाल फर्कनेको भिड बढेको हो ।

गड्डाचौकी सुदूरपश्चिम प्रदेश भित्रने प्रमुख नाका हो । भारतबाट फर्कनेहरुसँगै संक्रमण भित्रिने आशंकामा गड्डाचौकी नाकामा सुदूरपश्चिम प्रदेश सरकार र भीमदत्त नगरपालिकाले गत फागुन २३ गते ‘हेल्थ डेस्क’ स्थापना गरेको छ । यताबाट आउनेलाई ‘हेल्थ डेस्क’ मा चेकजाँच गरेर मात्र नेपाल भित्र्याउनने गरिँदै आएको छ । शनिबार पनि यस्तै गरिँदै थियो । तर, हेल्थ डेस्कमा रहेका उपकरण र स्वास्थयकर्मीले त्यहाँ लामबद्ध भिडलाई चेकजाँच गर्न नभ्याएपछि लाइन लम्बियो ।

डेस्कमा दुई वटा मात्रै थर्मोमिटर भएका कारण चेकजाँचमा ढिलाइ भएको हो । ६–७ घण्टा पालो कुर्दा समेत कोरोना जाँच नभएपछि धेरैले लाइन छोडेर घर फर्किएको प्रत्यक्षदर्शी बताउँछन् । गड्डाचौकीबाट भित्रिएका दुई जनालाई कोरोना संक्रमणको आशंकामा अस्पताल भर्ना गरिको छ ।

सात घण्टामै भारतबाट भित्रिए साढे ११ हजार नेपाली
पश्चिमी नाका गड्डाचौकी भएर नेपाल भित्रिनेहरुको संख्या पछिल्लो समय दिन प्रतिदिन बढ्दै गएको छ । शनिबार १२ बजेसम्म मात्रै साढे ११ हजारभन्दा बढी मानिस भित्रिएको हेल्थ डेस्कमा रहेकी अनमी निर्मला जोशीले जानकारी दिएकी छन् । हेल्थ डेस्क बिहान ५ बजेदेखि खुल्छ । सो नाका भएर नेपाल भित्रिने नेपाली अथवा भारतीयको त्यहाँ चेकजाँच गरिन्छ ।

शनिबार १२ बजेसम्मको तथ्याङ्क अनुसार ११ हजार ६०४ जनाको स्क्रिनिङ गरिएको अनमी जोशीले जानकारी दिएकी छन् । जसमा केहीमा सामान्य ज्वरो समेत देखिएको उनको भनाइ छ । यद्यपि कतिपय व्यक्तिहरु स्क्रिनिङमा छुट्ने गरेका छन् ।