काठमाडौं । सोमबार ५ बजे प्रधानमन्त्री निवास बालुवाटारमा मन्त्रिपरिषद् बैठक बोलाइएको छ।
आज बस्ने मन्त्रिपरिषद् बैठकमा लकडाउनलगायतका विषयमा निर्णय हुनसक्ने बुझिएको छ। पछिल्लो समय काठमाडौं उपत्यका लगायतका स्थानमा कोरोना संक्रमितको संख्या ह्वात्तै बढेको छ । सोहीकारण आजको बैठकले यसबारे निर्णय गर्ने तयारी गरेको थाहा भएको छ ।
यस अघि सरकारले भदौ १ गतेदेखि हवाई उडान र लामो दूरीका सार्वजनिक सञ्चालन गर्ने निर्णय गरेको थियो। कोरोना संक्रमण बढेकाले त्यसलाई संशोधन गरिने जनाएको छ।
यसअघि प्रधानमन्त्री केपी शर्मा ओलीलाई विज्ञहरुले परीक्षणको दायरा बढाउन र काठमाडौं प्रवेशमा कडाइ गर्न सुझाव दिएका थिए।
प्रधानमन्त्री ओलीले सरकारले अध्ययन गरेर निर्णय गर्ने जनाएका थिए। यो अवधिमा कोरोना संक्रमणको अवस्था र नियन्त्रणका लागि चाल्नुपर्ने कदमबारे अध्ययन गरिएको जनाएको छ।
अहिले परीक्षण कम भएपनि संक्रमितको संख्या दैनिक बढ्दै गएको छ। प्रदेश २ का समुदायस्तरमै कोरोना फैलिएको छ भने काठमाडौं उपत्यकामा पनि संक्रमण बढेको छ।
