डा. बाबुराम भट्टराईको मर्यादा फेरि पनि चौथोमै, राष्ट्रिय परिषदको टुंगो लागेन

काठमाडौं । जनता समाजवादी पार्टीको साउन २१ देखि बसेको केन्द्रीय कार्यकारिणी समितिको बैठक शनिबार सम्पन्न भएको छ । जसपाको ५१ सदस्यीय कार्यकारिणी समितिको बैठकमा पूर्वप्रधानमन्त्री डा. बाबुराम भट्टराईलाई चौथो मर्यादाक्रममै राखिएको बिषयले चर्चा पाएको छ । २०७७ जेठ २५ मा निर्वाचन आयोगमा पार्टी दर्ता गराउँदा महन्थ ठाकुर र उपेन्द्र यादव अध्यक्ष रहने र त्यसपछिको मर्यादाक्रममा अशोकुमार राई र डा. बाबुराम भट्टराई र राजेन्द्र महतो रहने गरी मर्यादाक्रम राखिएको थियो । शनिबार सम्पन्न जनता समाजवादी पार्टीको बैठकमा पनि भट्टराईलाई चौथो नम्बरमै राखिएको छ ।

पार्टी दर्ता गर्दा चौथो नम्बरमा राखिए पनि उनलाई संघीय परिषदको अध्यक्ष बनाउने भनिएको थियो । तर शनिबारको बैठकले संघीय परिषदको अध्यक्ष पनि बनाएन । उनलाई चौथो बरियतामै राखी बैठक सम्पन्न भएको थियो । बैठकले मर्यादाक्रम पनि नतोकी सम्पन्न भएको छ । भट्टराईलाई चौथो मर्यादाक्रममा राखिएकोबारेमा जसपाका कार्यकारिणी सदस्य मनिषकुमार सुमन भन्छन्, उहाँको मर्यादाक्रम त पार्टी दर्ता गरेको दिन जेठ २५ मै तोकिएको हो । पार्टी दर्ता गर्दा उहाँ चौथो नम्बरमा हुनुहुन्थ्यो । त्यही कायम छ । मर्यादाक्रम तोकिएन त भन्ने जिज्ञासामा उनले भने–‘मर्यादाक्रम त निर्वाचन आयोगमा पार्टी दर्ता गर्दाकै दिन तय भइसकेको छ ।’

जसपाको शनिबार सम्पन्न बैठकले राष्ट्रिय परिषद गठन नै नगरी टुंगिएको छ । जबकि कार्यकारिणी बैठकको एजेन्डा राष्ट्रिय परिषद गठन पनि थियो ।

चोक्टा खान गएका बाबुराम..डुबे

माओवादी केन्द्रमा सधैं दोस्रो नम्बरको नेतामा सीमित भएको र प्रचण्ड रहुन्जेल पहिलोमा आउन असम्भव देखेपछि डा. बाबुराम भट्टराईले नयाँशक्ति पार्टी खोलेर त्यसको सुप्रिमो भए । पूर्वप्रशासक, अवकाश पाएका प्रहरीका उच्च अधिकारीदेखि नेपाली कांग्रेस र तत्कालीन एमालेभित्र अस्वीकृत भएका असन्तुष्टहरुको जमात भेला गरी उनले पार्टी गठन गरे । ठूला पार्टीको विकल्पका रुपमा नयाँशक्ति भारतको अरविन्द केजरीवालको आप पार्टी जस्तै हुने अपेक्षा बाबुरामको थियो । केजरीवालाको त दिल्लीमा प्रभाव अद्यापि छ । तर भट्टराईले गोरखामा चुनाव जित्न पनि कांग्रेसको शरणमा जानुपर्यो । २०७३ को स्थानीय चुनावसम्म आइपुग्दा बाबुरामको नयाँशक्ति पार्टीको कुनै अस्तित्व देखिएन । त्यसअघि नै बाबुरामको कार्यशैलीबाट धेरै नेताहरु पुरानै पार्टीमा फर्किसकेका थिए । स्थानीय चुनावपछि बाँकी पनि फर्किए । पूर्वप्रशासकहरु पनि हतोत्साही हुँदै पार्टी त्यागेपछि बाबुराम २०७४ को प्रतिनिधिसभा निर्वाचनमा गोरखाबाट चुनाव जित्नका लागि कांग्रेसको शरणमा पुगे ।

२०७४ को निर्वाचनपछि बाबुराम उपेन्द्र यादव नेतृत्वको संघीय समाजवादी पार्टीसँग मिल्न पुगे । बाबुराम र उपेन्द्रको एकतापछि समाजवादी पार्टी नेपाल बन्यो । त्यहाँ उनी संघीय परिषदको अध्यक्ष भए पनि अधिकारका हिसाबले दोस्रो नै थिए । २०७७ बैशाख १० मा प्रधानमन्त्री केपी शर्मा ओलीले समाजवादी पार्टीका उपेन्द्रसँग असन्तुष्टहरुलाई लिएर पार्टी फुटाउन अध्यादेश ल्याएपछि रातारात राष्ट्रिय जनता पार्टीसँग एकता गर्न पुगेपछि बाबुरामको हैसियत चौथो नम्बरमा पुगेको थियो ।

२०७७ जेठ २५ मा निर्वाचन आयोगमा पार्टी दर्ता गराउँदा महन्थ ठाकुर र उपेन्द्र यादव अध्यक्ष रहने र त्यसपछिको बरियतामा अशोकुमार राई र डा. बाबुराम भट्टराई र राजेन्द्र महतो रहने गरी मर्यादाक्रम राखिएको थियो । शनिबार भएको जनता समाजवादी पार्टीको बैठकमा पनि भट्टराईलाई चौथो नम्बरमै राखिएको छ । पार्टी दर्ता गर्दा चौथो नम्बरमा राखिए पनि उनलाई संघीय परिषदको अध्यक्ष बनाउने भनिएको थियो । तर शनिबारको कार्यकारिणी समितिको बैठकले संघीय परिषदको अध्यक्ष पनि बनाएन । उनलाई चौथो बरियतामै राखी बैठक सम्पन्न भएको थियो ।