काठमाडौँ । नेपाली राष्ट्रिय क्रिकेट टोलीले टि–२० श्रृङखलाको तेस्रो खेलमा घरेलु टिम केन्यालाई पराजित गरेको छ । आज भएको खेलमा नेपालले केन्यालाई चार विकेटले हराएको हो ।
नैरोबीस्थित जिमखाना क्रिकेट मैदानमा केन्याले जितका लागि दिएको १५७ रनको लक्ष्य पछ्याएको नेपालले १९ ओभर ३ बलमा ६ विकेट गुमाउँदै लक्ष्य पूरा गरेको हो । नेपालका लागि ज्ञानेन्द्र मल्लले सर्वाधिक ४६ रनको योगदान गरे।
त्यस्तै डेब्यु खेलाडी अर्जुन साउदले ३५, उप कप्तान रोहित पौडेलले २९, पवन सर्राफले २०, आदिल अन्सारीले १६ र दीपेन्द्र सिंह ऐरी ६ रन बनाए । बलिङतर्फ केन्याका भिराज पटेल र युगिनी ओचिङले दुई–दुई विकेट लिए ।
यसअघि टस हारेर पहिले ब्याटिङ गरेको केन्याले २० ओभरमा दुई विकेट गुमाएर १५६ रन बनायो । त्यस्तै केन्याका लागि इर्फान करिमले सर्वाधिक पटेलले ७३, इर्फान करिमले ५५ रन, सुकदीप सिंहले ८, कोलिन्स ओब्यूएले १४ रन लिए ।
नेपालका लागि सोमपाल कामी र आदिल अन्सारीले एक–एक विकेट लिए । यस जितसँगै पाँच खेलको सिरिजमा नेपालले २–१ को अग्रता बनाएको छ । यसअघि पहिलो खेलमा नेपालले केन्यालाई ५ विकेटले हराएको थियो । दोस्रो खेलमा भने केन्याले नेपाललाई १८ रनले हराएको थियो । नेपाल र केन्याबीच चौंथो टि–२० खेल भोलिको लागि तय गरिएको छ ।
