काठमाडौँ, ५ चैत । गत आर्थिक वर्षको तुलनामा यस वर्ष विदेशमा काम गर्ने नेपालीले पठाउने रकम विप्रेषण (रेमिट्यान्स) घटेको छ ।
चालु आव २०७६/७७ को ७ महिनामा ५ खर्ब १३ अर्ब रुपैयाँमात्र भित्रिएको छ । गत आर्थिक वर्ष २०७५ को साउनदेखि माघसम्म ५ खर्ब १५ अर्ब रुपैयाँ रेमिट्यान्स प्राप्त भएको थियो ।
गत आवको तुलनामा यस वर्ष ०.५ प्रतिशतले घटेको नेपाल राष्ट्र बैंकले जनाएको छ । गत वर्ष २८.५ प्रतिशतले बढेको रेमिट्यान्स आप्रवाह भित्रिएको थियो ।
तर गत वर्षको तुलनामा यस वर्ष वैदेशिक रोजगारीमा जानेको संख्या भने बढेको छ । राष्ट्र बैंकका अनुसार यस अवधिमा अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण)का आधारमा वैदेशिक रोजगारीमा जाने नेपालीको संख्या २१.७ प्रतिशतले बढेको छ ।
अघिल्लो वर्षको सोही अवधिमा यस्तो संख्या ३७.५ प्रतिशतले घटेको थियो । पुनः श्रम स्वीकृतिका आधारमा वैदेशिक रोजगारीमा जाने नेपालीको संख्या भने ०.६ प्रतिशतले घटेको छ । अघिल्लो वर्षको सोही अवधिमा यस्तो संख्या ४.९ प्रतिशतले बढेको थियो ।
