‘सशंकित’ प्रचण्डले भेटे प्रधानमन्त्री ओली

काठमाडौं । पछिल्लो समय नेपाल कम्युनिष्ट पार्टी (नेकपा) भित्र शंका-उपशंकाको अवस्था चलिरहेको छ । पार्टी भित्र चरम विवाद रहेको र एकले अर्कालाई पछार्ने नियत लिएका कारण पनि यस्तो अवस्था आएको जानकारहरु बताउँछन् ।

बिहीबार प्रधानमन्त्री केपी शर्मा ओलीले प्रमुख प्रतिपक्षी नेपाली कांग्रेसका सभापति शेरबहादुर देउवासँग भेटेका थिए । लामो छलफल चलेको हल्ला बाहिरिएसँगै नेकपा अध्यक्ष पुष्पकमल दाहाल प्रचण्डको समूहले त्यो भेटलाई शंकाको दृष्टिले हेरेको खुमलटार स्रोतबाट थाहा भएको छ । 

यसअघि पनि प्रम ओली आफ्ना विश्वास पात्र नेकपा संसदीय दलका उपनेता सुवास नेम्वाङमार्फत सत्ता सहकार्यको प्रस्ताव देउवा समक्ष पठाएका थिए । अकस्मात प्रस्ताव आउँदा अचम्मा परेका देउवाले खासै सकारात्मक उत्तर नदिएपनि अहिले भने देउवा प्रस्तावमा थप छलफल गर्न रुचाएको चर्चा राजनीतिक वृत्तमा छ । 

कांग्रेसले औपचारिक रुपमा कोरोना संक्रमणका बारेमा सरकारको ध्यानाकर्षण गराएको जनाएपनि नेकपा भित्रका ओली इतर समूहको शंका हट्न नसेकेको बताइएको छ ।

सोहीबारे बुझ्न भन्दै प्रचण्ड आज बिहान प्रम निवास बालुवाटार पुगे । बालुवाटारमा प्रम ओली र प्रचण्डबीच दुई घण्टा कुराकानी भएको थियो । 

कुराकानीको क्रममा देउवासँगको भेटबारे पनि प्रसंग चलेको बालुवाटार स्रोतले बताएको छ । 

भेटमा स्थायी समितिको निरन्तरता लगायत पार्टी विवादको बारेमा समेत चर्चा चलेको भनिएको छ ।