हरिवन नगरपालिकाः एउटा वडा नजितेका बुढाथोकी मेयरमा निर्वाचित, ५ वडा जित्दा प्रसाई हारे 

सर्लाही । हरिवन नगरपालिकाको प्रम्ुखमा माओवादी केन्द्रका रेमश बुढाथोकी (कमल) निर्वाचित भएका छन् । एमालेका गणेशप्रसाद प्रसाईलाई पराजीत गरी उनी निर्वाचित भएका हुन् ।

 बुढाथोकीले ७००२ मत प्राप्त गरी बिजयी भएका छन् भने प्रसाईँले ६८४९ मत ल्याएका छन् । प्रसाईँ १५३ मतान्तरले पराजीत भएका हुन् । हरिवनका ११ वटा वडामध्ये ५ वटा वडा जितेको एमाले मेयरमा पराजीत भएको छ । प्रसाईको वडामा ८० प्रतिशत एमालेको मत भए पनि उनले १ मतले मात्र लिड गरेका थिए ।

 ४ वटा वडामा नेपाली कांग्रेसले जितेको छ । २ वटा वडामा नेकपा समाजवादीले जितेको छ । माओवादीले एउटा पनि वडा नजिते पनि मेयरमा रमेशले जित निकालेका छन् । मेयरमा एकीकृत समाजवादीका सुरेन्द्रकुमार लामाले ३८३६ मत र कांग्रेसका रामप्रसाद मैनालीले २९३६ मत पाएर तेस्रो र चौथो भएका छन् ।  

उपमेयरमा भने एमालेले जितेको छ । एमालेकी हरिमाया घलान विजयी भएकी छन् । उनले ६८५५ मत प्राप्त गरेकी छन् भने उनका निकटतम प्रतिद्वन्द्वी माओवादीका पदमा मुक्तानले ५३२१ मत ल्याएकी छन् ।  

किन हारे प्रसाई ?

हरिवन नगरपालिकाका मेयरमा प्रसाई एमाले बृत्तमै अलोकप्रिय मानिन्छन् । उनले ५१ करोड भन्दा बढी नगरपालिकामा फस्र्योट गर्न बाँकी छ । नगरपालिका भवन इन्दुशंकर चिनीमिल नजिक फोहोर पानी बग्ने र डेंगु फैलने ठाउँमा बनाए ।

सहरी विकास विभागबाट छुट्याइएको १७ करोड रुपैयाँमा उक्त भवन बनाए पनि साढे ७ करोड भन्दा बढी अनियमितता गरेको आरोप छ । नगरपालिका भवन निर्माण भएको १ बर्ष पूरा हुँदा पनि प्रयोगमा आउन सकेको छैन । गुणस्तरहीन भवन बनेकाले पास हुन नसकेको र प्रयोगमा आउन नसकेको स्रोत बताउँछ ।

नगरपालिका भवन सारिसकेपछि प्रसाईले साढे २ बिगाहा जग्गा खरिद गरेको, मालपोत र नापी कार्यालय नजिक अरु ३ बिगाहा जग्गा खरिद गरेको, फाष्टट्रयाक ललितपुरमा ३ रोपनी किनेको बिषय पनि हरिवनका एमालेबीचमा ब्यापक छ ।  वडाध्यक्षहरु शम्भु मैनाली र शेखरेजा मेहबुबसँग मिलेर जग्गामा उनले लगानी गरेको बिषय पनि एमालेकै कार्यकर्ताहरुले प्रचार प्रसार गरेका थिए ।  

  ओलीको नाम लिंदै अगाडि पछाडि चुल्ठेमुन्द्रे लिएर हिंड्ने र भ्रष्टाचारमा चुर्लुम्म डुबेका कारण पनि एमालेकै कार्यकर्ताले मत नदिई पराजीत गरिदिएका छन् । नगरमा गरेको अनियमितताको रकम काठमाडौंको कागेश्वरी मनोहरामा रेष्टुरेन्ट खोेलेको, गाडी किनेको बिषय पनि उठेको छ ।