काठमाडौं, ५ चैत । भोली अर्थात् मार्च १९ तारिखबाट अस्ट्रेलियास्थित नेपाली राजदूतावासले अत्यावश्यकबाहेकका सेवाका लागि दूतावास नआउन अपिल गरेको छ । कोरोना संक्रमणबाट बच्न अस्ट्रेलियन सरकारले एक विज्ञप्ति जारी गर्दै उक्त अपिल गरेको हो । विज्ञप्तिमा उल्लेख भएअनु्सार दूतावासले यदि आउनै परेमा समूहमा नभई एक्लै उपस्थित हुनको लागि आग्रह गरेको छ ।
कोरोना संक्रमणबाट जनतालाई बचाउनको लागि दूतावासले राहदानी नवीकरण, यात्रा अनुमतिपत्र, गैरआवासीय नेपाली परिचयपत्र, भिसा र सवारी चालक अनुमतिपत्रलगायतका कागजात प्रमाणीकरण गर्नुपर्ने भए हुलाकमार्फत पठाउन आदेश दिएको छ ।
अधिकृत वारेशनामा, मञ्जुरीनामालगायत राजदूतावासमा स्वयं उपस्थित भई सहीछाप गरिनुपर्ने कामका लागि भने नेपाली दूतावास जान सक्नेछन् । तर, त्यसका लागि सर्त लागू हुनेछ ।
क्यानबेरास्थित नेपाली राजदूतावासका अनुसार, अत्यावश्यकीय सेवा लिन आउने व्यक्तिले पहिले त्यसबारे टेलिफोनमार्फत जानकारी गराउनु पर्नेछ । यसरी जानकारी गराएका व्यक्तिले आफूमात्रै आएर बिहान १० देखि १ बजेभित्र सेवा लिनसक्नेछन् ।
‘राजदूतावास आउनुपर्ने अत्यावश्यक काम भएमा टेलिफोन सम्पर्क गरी समय लिएर मात्र अफिस खुल्ने दिन बिहान १० देखि १ बजेसम्म आउने,’ कन्सुलर सेवासम्बन्धमा दूतावासद्वारा जारी सूचनाको तेस्रो बुँदामा भनिएको छ ।
अत्यावश्यक अवस्थाबाहेकमा हिँड्डुल नगर्न पनि त्यहाँस्थित दूतावासले नेपालीलाई आग्रह गरेको छ ।
विश्वव्यापी रूप लिएको कोरोना भाइरस अस्ट्रेलियाका लागि पनि टाउको दुखाइको विषय बनेको छ । वर्ल्डओमिटर्सका अनुसार, कोरोना संक्रमणबाट हालसम्म यहाँका ५ जना मानिसको ज्यान गइसकेको छ भने ४ सय ५२ संक्रमित छन् ।
अस्ट्रेलियामा रहेका १ नेपालीमा समेत कोरोना संक्रमण पुष्टि भएको छ । ती नेपालीको हाल उपचार भइरहेको छ । कोरोनाको संक्रमण फैलिएपछि अध्ययन, रोजगारीलगायतमा आबद्ध नेपालीमा त्रास छाएको छ ।
