माओवादी केन्द्रको केन्द्रीय कमिटी बैठक बस्दै, यी हुन् मुख्य तीन एजेण्डा

काठमाडाैं । सत्तारुढ नेकपा माओवादी केन्द्रको केन्द्रीय कमिटी बैठक आज (सोमबार) बस्दैछ । 

बैठक बिहान ११ बजे बस्ने माओवादी केन्द्रीय कार्यालयका सचिव श्रीराम ढकालले जानकारी दिए । यसअघि आइतबार बिहान बस्ने भनिएको बैठक दुई पटकसम्म सारिएर अन्त्यमा स्थगित नै भएको थियो। 

माओवादी केन्द्रीय कमिटी बैठक गत शुक्रबारबाट सुरु भएको हो । आजको बैठकमा केन्द्रीय कमिटीलाई पूर्णता, पोलिटव्युरो, स्थायी कमिटी गठन लगायतका एजेण्डामा छलफल हुने ढकालको भनाइ छ। 

माओवादीले पदाधिकारीसँगै स्थायी कमिटी चयनको तयारी पनि थालेको छ । गत शुक्रबारको बैठकमा एमसीसीलगायतका समसामयिक  विषयमा  छलफल  भएको थियो ।

ढकालका अनुसार बैठकको कार्यसूची  कार्ययोजना  निर्माण  र संगठन हुनेछ । गत पुसमा सम्पन्न  माओवादीको आठौँ  महाधिवेशनले २४७  केन्द्रीय  सदस्य  चयन गरेको थियो ।