सत्तारुढ गठबन्धनको बैठक निष्कर्षविहीन, बैठक अपरान्ह ४ बजे फेरि बस्ने

काठमाडौं । आगामी निर्वाचनका विषयमा छलफल गर्न बसेको पाँच दलीय गठबन्धनको बैठक कुनै सहमति जुटाउन नसकी  सकिएको छ  । बैठक आज  बिहान ९ बजेदेखि प्रधानमन्त्री निवास बालुवाटारमा बसेको थियो।
प्रतिनिधि सभा, प्रदेश सभा र स्थानीय तह निर्वाचनको बारेमा पाँच दलीय गठबन्धनको बीचमा विगतदेखी निरन्तर छलफल भईरहेको छ । तर संविधान र स्थानीय तह निर्वाचन ऐन बाझिएका कारण कानून संशोधन गरेर निर्वाचन मिति तोक्नुपर्नेमा छलफल भईरहेको छ ।

बैठकमा संविधानसँग बाझिएका कानून संशोधन गर्ने विषयमा गठबन्धन दलबीच छलफल भएपनि सहमति जुटन नसकेको हो। कानून संशोधनको विषयमा पार्टीमा आन्तरिक छलफल पछि फेरि गठबन्धन बैठक बस्ने सहमति भएको छ । बैठक अपरान्ह ४ बजे बस्ने छ।
संविधानसंग बाझिएको ऐन संशोधन गरेर तीनै तहको निर्वाचन एकै पटक गर्नुपर्ने अडानमा नेकपा माओवादी केन्द्र र नेकपा एकीकृत समाजवादी छ । तर प्रमुख सत्तारुढ नेपाली कांग्रेसभित्र एकमत छैन् । संविधान अनुसार बैशाखमै स्थानीय तहको निर्वाचन हुनुपर्ने सभापति एवं प्रधानमन्त्री शेरबहादुर देउवाइतर समूहको अडान छ ।

देउवा समूहले सबै राजनीतिक दलको सहमतीमै कानून संशोधन गरेरै निर्वाचन गर्नुपर्ने पक्षमा उभिदै आएको छ । प्रमुख प्रतिपक्षी नेकपा एमालेले स्थानीय तहको निर्वाचन बैशाखमै हुनुपर्ने अडान व्यक्त गर्दै आएको छ ।