आज सत्ता गठबन्धनको बैठक बस्दै, निर्वाचनबारे छलफल हुने

फाइल फोटो

काठमाडौं । निर्वाचनबारे छलफल गर्न सत्तारुढ गठबन्धनको बैठक आज बस्दै छ । बैठक  आज (शनिबार) बिहान ९ बजे प्रधानमन्त्रीनिवास बालुवाटारमा बोलाइएको हो ।

बैठकमा स्थानीय तहसँगै प्रदेश र संघीय निर्वाचनका विषयमा छलफल हुने बताइएको छ । यस्तै राष्ट्रिय सभा निर्वाचनका विषयमासमेत समीक्षा हुनेछ ।

निर्वाचन आयोगले वैशाखमै निर्वाचन गर्नेगरी मिति तोक्न पटकपटक राय दिँदा पनि सत्ता गठबन्धनमा सहमति नजुट्दा घोषणा हुन सकेको छैन ।

प्रधानमन्त्रीको सरकारी निवास बालुवाटारमा  हिजो (शुक्रबार) प्रधानमन्त्री शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड र एकीकृत समाजवादीका अध्यक्ष माधव नेपालबीच स्थानीय तहको निर्वाचनको मिति र ऐन संशोधनलगायत विषयमा छलफल भएको थियो । 

कांग्रेस केन्द्रीय कार्यसमितिको शुक्रबारको बैठकमा महामन्त्री गगन थापाले स्थानीय तहको चुनावलाई लिएर गठबन्धनले अघि सारेको विकल्प संविधानसम्मत नभएको बताइसकेका छन् ।